Keıbir áleýmettik taýarlar óndirýshiden tutynýshyǵa jetkenshe 10 ese qymbattap jatyr – depýattyq saýal

ASTANA. QazAqparat – Senator Qaırat Tastekeev áleýmettik mańyzy bar ónimder baǵasyn 15%-dan asyrmaý týraly zań talaby barlyq jerde saqtalmaıtynyn aıtyp, depýtattyq saýal joldady, dep habarlaıdy QazAqparat tilshisi.

«Áleýmettik mańyzy bar azyq-túlik taýarlarynyń quny óndirýshiden sońǵy tutynýshyǵa jetkenshe negizsiz 10 ese ósý faktileri bar. Bul rette aıyrmashylyqtyń basym úlesi azyq-túlik dúkenderine tıesili boldy. Mysaly, eger «Magnum» gıpermarketinde qanttyń baǵasy 500 teńge bolsa, turǵyn úılerde ornalasqan dúkenderde bul taýardyń quny 900 teńgege jetedi. Baǵanyń kóterilý sebebi ákimdikterdiń saýda qyzmetine turaqty monıtorıng júrgizbeýine baılanysty dep sanaımyn», - dedi Qaırat Tastekeev.

Sondaı-aq, Senat depýtaty baǵa monıtorıngin ashyq júrgizý úshin taýar jetkizý protsesin bastan-aıaq tsıfrlandyrý qajettigin aıtty.

«Saýda jáne ıntegratsııa mınıstrligi oblystardyń, qalalardyń ákimdikterimen birlesip, bólshek saýda ústemesiniń saqtalýyna monıtorıngti kúsheıtip, qabyldanyp jatqan sharalardyń tıimdiligin arttyrýy tıis. Naryqtyq tetikterge sáıkes keletin azyq-túlik baǵasyn tejeý boıynsha túbegeıli jańa tásilderdi ázirleý qajet. Osy taýarlardy naryqqa shyǵarýdan bastap, túpkilikti tutynýshyǵa satýǵa deıingi búkil saýda protsesin tsıfrlandyrý kerek», - dedi senator.