Keı preparattardyń zııandylyq sanatyn aýystyrý qajet - depýtat
«Memleket basshysy bıyl Qazaqstan halqyna Joldaýynda sıntetıkalyq esirtkini tutyný problemasyn qozǵady. Prezıdenttiń aıtýynsha, sońǵy úsh jylda aınalymnan alynǵan sıntetıkalyq esirtki kólemi 10 ese ósken. Jyl ótken saıyn sıntetıkalyq esirtki arzan ári qoljetimdi bolyp barady. Tájirıbe kórsetip otyrǵandaı esirtkiniń atalǵan túrin áleýmettik jeliler, messendjerler arqyly, tipti úıge de jetkizip beredi», - dedi QR Parlamenti Májilisiniń depýtaty Mádı Elýbaev depýtattyq saýal joldaı otyryp.
2021 jylǵy 10 maýsymda Qazaqstan Respýblıkasy Úkimetiniń №396 Qaýlysymen adam densaýlyǵyna zııandy zattar tizbesi anyqtaldy. Oǵan «Tramadol», «Tropıkamıd», «Mıdaks», «Somnol» jáne «Lırıka» preparattary engizildi.
Májilis depýtatynyń aıtýynsha, joǵaryda atalǵan preparattar aınalymyna zańmen eshqandaı jaýapkershilik kózdelmegen.
«Osy oraıda «Tramadol», «Tropıkamıd», «Mıdaks», «Somnol» jáne «Lırıka» preparattaryn adam ómiri men densaýlyǵyna zııandy áser etetin kúshti zattar sanatynan steroıd emes qabynýǵa qarsy preparattar sanatyna aýystyrǵan jón dep esepteımiz», - deıdi ol.
Sonymen qatar halyq qalaýlysy atalǵan máseleni erekshe baqylaýǵa alyp, zań aıasynda sheshim qabyldaý kerektigin aıtty.
«Birinshiden, farmatsevtıkalyq uıymdar men medıtsınalyq mekemelerge kórsetilgen preparattardy taǵaıyndaý men satýǵa qoıylatyn talaptarǵa baqylaýdy kúsheıtý kerek. Ekinshiden, Qazaqstan Respýblıkasynyń qylmystyq jáne ákimshilik quqyq buzýshylyq kodeksinde kózdelgen esirtki quraldarymen jáne psıhotroptyq zattarmen jumys isteý qaǵıdalaryn buzǵany úshin jaýapkershilikti kúsheıtý qajet», - dedi M. Elýbaev.
Foto: www.parlam.kz