Keı óńirdiń turaqty jumys oryndaryn qurý deńgeıi tómen - vıtse-mınıstr

NUR-SULTAN. QazAqparat - Elimizdiń keıbir óńirinde turaqty jumys oryndaryn qurý jumystary durys júrgizilmeı jatyr. Bul týraly QR Eńbek jáne halyqty áleýmettik qorǵaý vıtse-mınıstri Serik Shapkenov aıtty, dep habarlaıdy QazAqparat tilshisi.

«Memleket basshysy óńirlerde turaqty jumys oryndaryn qurý tapsyrmasyn berdi. Shilde aıynda ótken Úkimettiń keńeıtilgen otyrysynda da osy másele kóterildi. Qazirgi ýaqytta mınıstrlik barlyq óńirmen memorandým jasady. Memorandýmǵa sáıkes, 431 myń turaqty jumys ornyn qurýymyz kerek. Búginde 148 myń jumys orny quryldy. Árıne, keı óńirde jumys óte tómen, al keıbirinde joǵary deńgeıde júrgizilip jatyr. Mınıstrlik óńirlermen birlese otyryp, bul jumysty odan ary jalǵastyratyn bolady», - dedi ol Ortalyq kommýnıkatsııalar qyzmetindegi baspasóz máslıhatynda.

Sonymen qatar vıtse-mınıstrdiń aıtýynsha, «Nurly jer», «Nurly jol», «Óńirlerdi damytý», «Tsıfrlyq Qazaqstan» baǵdarlamalary aıasynda 364 myń adamdy jumyspen qamtý josparlanǵan. Qazirgi tańda 210 myń adam jumysqa ornalasty.

«Bul rette qurylys, aýyl sharýashylyǵy jáne saýda mamandyqtary jumysqa kóp ornalasqan. Sondyqtan bul baǵdarlamalardyń da oryndalýyn, jumys oryndarynyń qurylýyn Eńbek mınıstrligi baqylaýynda ustaıdy», - dedi Serik Shapkenov.