Keı óńirde balalarǵa arnalǵan neırohırýrgııa oryndary joq – mınıstr sebebin aıtty

ASTANA. QazAqparat – Elimizdiń keıbir oblystarynda balalar neırohırýrgııasyna arnalǵan tósek-oryn múldem joq. Atalǵan jaıtqa qatysty Densaýlyq saqtaý mınıstri Ajar Ǵınııat túsinik berdi, dep habarlaıdy QazAqparat tilshisi.

«Iá, ulttyq neırohırýrgııa ortalyǵy usynǵan prezentatsııada birneshe oblysta balalar neırohırýrgııasy boıynsha tósek-oryndardyń joqtyǵy aıtyldy. Bul jańa oblystar, sebebi oblys ekige bólingen kezde, bar tósek-oryndar burynǵy oblys ortalyǵynda qaldy. Qazir bul máseleni sheshý úshin «Qazaqstan halqyna» qorynyń qoldaýymen jańa oblystarda qural-jabdyq satyp alynyp, neırohırýrgııalyq bólimder ashylady», - dedi Ajar Ǵınııat elordada ótip jatqan neırohırýrgtardyń V kongress barysynda BAQ ókilderiniń saýalyna jaýap bere turyp.

Alaıda, BAQ ókilderi balalar neırohırýrgııalyq tósek-orny joq óńirlerdiń qatarynda SQO-nyń baryn aıtyp, jańa oblys emestigin alǵa tartty.

«Jalpy, tósek-oryn qajettilikke qaraı uıymdastyrylady. Eger óńirde balalar neırohırýrgııasy boıynsha medıtsınalyq kómek kóp qajet etilmese nemese balalar sany az bolsa, ondaı jaǵdaıda qyzmetti jaqyn mańdaǵy aýdan nemese oblys ortalyǵynan alady», - dep jaýap berdi vedomstvo basshysy.

Mınıstrdiń aıtýynsha, neırohırýrgııa salasy elimizde qarqyndy damyp keledi, sońǵy tehnologııalar engizilip jatyr. Sonymen qatar, salada Eýropa elderimen básekelese alamyz.

Aıta keteıik, elordada otandyq neırohırýrgterdiń V kongresi ótip jatyr.

Memleket basshysy ulttyq neırohırýrgııa ortalyǵyn 15 jyldyǵymen quttyqtaǵan edi.