Keı adamdardyń mádenıetsizdigi elimizdiń halyqaralyq abyroıyna nuqsan keltirip júr – Prezıdent

ASTANA. QazAqparat – Prezıdent Qasym-Jomart Toqaev Parlament palatalarynyń birlesken otyrysynda quqyq qorǵaý mekemeleriniń jumysyn synǵa aldy, dep habarlaıdy QazAqparat tilshisi.

«Zań jáne tártip, ózara túsinistik, tilektestik pen jaýapkershilik bárinen bıik turatyn tıimdi memleket bolamyz. Qoǵamdyq tártipti buzatyn kez kelgen arandatýshylyq áreketke qatań tosqaýyl qoıý qajet. Ókinishke qaraı, quqyq qorǵaý mekemeleri jáne aımaq basshylary osy jumysty durys atqarmaı otyr. Basqa sózben aıtqanda, zań ústemdigin qamtamasyz etpeıdi. Sonyń saldarynan qoǵamymyzda udaıy keleńsiz oqıǵalar bolyp jatady», - dedi Qasym-Jomart Toqaev.

Mysaly, daladaǵy, kóshedegi vandalızm, keıbir azamattarymyzdyń tártipsizdigi, mádenıetsizdigi, neshe túrli turmystyq janjaldar elimizdiń halyqaralyq arenadaǵy abyroıyna nuqsan keltirip júr.

«Taǵy da aıtamyn: bizdiń negizgi maqsatymyz – zańdy qatań saqtaý, qoǵamdyq tártipti qamtamasyz etý. Biz mádenıetti, bilimdi, ǵylymdy damytý arqyly qazirgi ashyq álemniń bir bólshegi bolýǵa umtylýymyz kerek», - dedi Memleket basshysy.