Kesteden kartına tigetin áıel: Qolymnan shyqqan ár týyndynyń maǵynasy bar

ÓSKEMEN. QazAqparat – Ine men jipti janyna serik etken Názıgúl Áýelbek Shyǵys Qazaqstan oblysy Zaısan aýdanynda turady. Kilem, túrli kıim-keshek tigip qana qoımaı, kesteden kartına jasaıtyn óneri de bar. Búginde súıikti isin kásipke aınaldyryp, adal eńbegimen nápaqasyn taýyp júr. Qolónerge qyzyǵýshylyq tanytqan qyz-kelinshekterge ustazdyq ta etedi. QazAqparat tilshisi 8 naýryz – Halyqaralyq áıelder kúnine oraı Názıgúl Áýelbekpen suhbat qurǵan edi.

- Áńgimemizdi tiginshilikke degen qyzyǵýshylyǵyńyzdyń qalaı oıanǵanynan bastasaq.

- 1971 jyly Qytaı jerinde týdym. Ol jaqta mal sharýashylyǵymen aınalysyp, dámhana ashtym. Tiginshilik óner anamnan darydy. Basynda tek bos ýaqytta ermek úshin keste tigetinmin. Ony tabys kózi de qaramadym. Atamekenge oralǵanymyzǵa 11 jyl boldy. Kógedaı aýylynyń tynys-tirshiligimen bite qaınasyp kettik. Basynda nemen aınalysatynymdy biraz oılandym. Qazaqtyń ata kásibi – tórt-túlik ǵoı. Іri qara ustadyq. Ine men jip te kádege jarady. Qalyńdyqtyń jasaýyn jasap, sata bastadym.

- Taǵy qandaı zattar tigesiz?

- Kilem, kórpe-jastyq, kıim-keshek tigemin. Olardy qazaqy naqyshta oıýmen órnekteıtin. Qudaıǵa shúkir, tapsyrystar jıi túsip jatady. Zaısan halqy ǵana emes, basqa aýdandardan da tapsyrys beretinder bar. Budan bólek, túrli kartınalar tikkendi jaqsy kóremin.

- Osy jóninde tolyǵyraq aıtyp berseńiz. Qandaı kartınalaryńyz bar? Bir kartınaǵa shamamen qansha ýaqyt jumsaısyz?

- Kartınany tek qylqalammen emes, jippen de salýǵa bolady. Bul qazaq halqynyń kóne óneri. Ókinishke qaraı, qazirgi jastar ony umytyp barady. Qolymnan shyqqan ár týyndynyń maǵynasy bar. Mysaly, dana Abaıdyń portretin jasadym. Oǵan 2 aıǵa jýyq ýaqyt ketti. Uly aqyn aıtqan 5 asyl is pen 5 jamandyqty qasyna jazyp, qabyrǵaǵa ilip qoıdym. Buny jastarǵa úlgi-ónege bolsa eken degen maqsatpen istedim.

«Ana men bala» kartınasynda áıel zatynyń baýyr eti balasyna degen mahabbatyn kórsetýge tyrystym. Al jylqy beınelengen týyndyda tórt túliktiń tóresin erkindiktiń sımvoly retinde aıshyqtaǵym keldi. Bir kartınaǵa naqty osynsha ýaqyt ketedi dep aıtý qıyn. Kem degende 1 aıdaı ýaqyt jumsaımyn.

- Memleket tarapynan qandaı da bir kómek aldyńyz ba?

- 2018 jyly maǵan Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda qaıtarymsyz grant berildi. Sol aqshaǵa tigin mashınasyn satyp aldym. Osy rette, aýdan ákimdigine alǵysymdy bildirgim keledi. Halyqtyń óz isin alǵa jeteleýine osylaı kómek kórsetilip jatqany quba-qup.

- Aýyldastaryńyzǵa tigin tigýdi úıretip júrgenińizdi estidik. Aldaǵy ýaqytta úıirme ashqyńyz kele me?

- Iá. Qyzyǵýshylyq tanytqan qyz-kelinshekterge esh aqysyz bilgenimdi úıretýge daıynmyn. Bárine esigim ashyq. Osy ýaqytqa deıin 10-nan astam adamdy shákirt ettim. Tigý qaǵıdasyn túsindirip qana qoımaı, boıjetkenderge qazaqtyń kóneden kele jatqan mádenıetin, salt-dástúrin aıtamyn. Úıirme ashqym da keledi. Bári ýaqyt enshisinde ǵoı, aldaǵy ýaqytta sáti túsip te qalar.

- Tiginshilikpen aınalysqysy keletin adamnyń boıynda qandaı qabilet bolýy kerek?

- Eń birinshi – qyzyǵýshylyq qajet. Adam qandaı ispen aınalyssa da kóńili qalamasa odan esh nátıje shyqpaıdy. Odan soń sabyrlylyq, shydamdylyq kerek. Bir orynda tapjylmaı otyrý ońaı sharýa emes. Al kartına jasaý tipten qıyn. Ol úshin qol qabileti, dáldik, eptilik qajet. Eshteńe oılamaı bar nazaryńdy, oı-sanańdy soǵan arnaısyń. Sonda ǵana-aq kartına sátti shyǵady.

- Otbasyńyz jaıly aıtyp ótseńiz.

- Kúıeýim Erjet Dáýlethan áli Qytaı jerinde. Qujat jaǵy rettelmeı, osynda kele almaı jatyr. Mamandyǵy – muǵalim. Eki qyzymyz bar. Ekeýi de keste tige alady. Tuńǵyshymyz Zupar Shákárim atyndaǵy Semeı memlekettik ýnıversıtetin «shet tili» mamandyǵy boıynsha bitirgen. 4 tilde erkin sóıleıtin polıglot. Qazir Semeı qalasynda aǵylshyn tili páninen sabaq beredi. Kenjemiz Shynar 17 jasta. Onyń qalaýy – dáriger bolý.

- Aldaǵy josparlaryńyz qandaı?

- Tiginshilikti tastamaı, kásibimdi ary qaraı dóńgeletsem deımin. Dúken ashý jaıly oıym bar. Mal basyn arttyryp, sharýa qojalyǵyn da qurǵym keledi.

- Áńgimeńizge kóp rahmet!