Kerekýde qazynadan 89 mln teńgeden asa qarajat jymqyrǵan ákimdik qyzmetkerlerine úkim shyqty

<p>PAVLODAR. KAZINFORM - Pavlodar qalasy men Pavlodar aýdany ákimdikteriniń ókilderi qyzmettik babyn paıdalana otyryp, zańsyz jolmen alaıaqtyq shemalaryn júzege asyrǵan. Aıyptalýshylar sotta kinálaryn tolyq moıyndady jáne zalaldy ótedi.</p>

Pavlodar qalasynyń №2 sotynda asa iri kólemde birneshe ret alaıaqtyq jasaý faktisi boıynsha A.G., M.A., B.A., J.A. jáne A.A. esimdi azamattar tobyna qatysty qylmystyq is qysqartylǵan tártipte qaraldy. Belgili bolǵandaı, qalalyq jáne Pavlodar aýdandyq ákimdikteriniń apparatynda qyzmet etken beseý múgedekterdiń jeke kómekshileriniń jumysy úshin zańsyz aqsha aýdaryp kelgen. Osylaısha memleket qazynasyna 89 mıllıon teńgeden astam shyǵyn keltirgen.

«Aıyptalýshylardyń kinási kýálardyń aıǵaqtarymen, qujattamalyq jáne zattaı dáleldemelermen, sondaı-aq saraptamalyq qorytyndylarmen dáleldendi. Sottalýshylar kinálaryn tolyq moıyndady jáne zalaldy ótedi. Kináli tulǵalarǵa Qylmystyq kodekstiń 55-babynyń 4-bóligi negizinde ártúrli merzimge 3 jyl 6 aıdan bastap 5 jyl 6 aıǵa deıin bas bostandyǵyn shekteý túrindegi jaza taǵaıyndaldy», dep habarlady №2 qalalyq sottan.

Jaza arqalaǵan beseý probatsııalyq baqylaýǵa alynyp, májbúrli eńbekke tartylady. Sondaı-aq olar memlekettik qyzmette laýazymdardy atqarý quqyǵynan ómir boıyna aıyryldy.