Kerekýde dalada taý bop úıilip jatqan kartop kimge tıesili

<p>PAVLODAR. KAZINFORM — Áleýmettik jelilerde ıen dalada tonnalap shashylyp jatqan kartoptyń vıdeosy tarady. Beınejazbany taratýshylar bul Pavlodar oblysynda túsirilgen dep kórsetken.</p>

Beınejazba Instagram-daǵy @ egovpress paraqshasynda jarııalandy.

Taý-taý úıilgen kartopty kameraǵa túsirgen azamat qystaı qoımada saqtalyp kelgen ónimdi qoqysqa tastaǵansha, jergilikti ákimdik muqtaj jandarǵa úlestirip bermeı me degen narazylyǵyn aıtyp tur.

Al oqyrman qaýym bul jylda qaıtalanatyn áreket dep jazyp jatyr.

Óńirlik aýyl sharýashylyǵy basqarmasynyń ókilderi atalǵan beınejazba Pavlodar oblysynyń aýmaǵynda túsirilmegen dep otyr.

«Bizdiń basqarma mamandary qoqysqa tastalǵan kartop máselesi boıynsha monıtorıng júrgizdi. Tuqym sharýashylyqtary óńirdegi tuqymdy kartopty tolyqtaı satqanyn málimdedi. Al iri kókónis qoımalarynda saqtalyp kelgen kartop buzylmaǵan jáne olar da tolyq satylyp ketken. 17 sáýir kúni Pavlodar aýdanynyń Zarıa aýyly mańyndaǵy qoqys alańyna jergilikti sharýashylyq qoımada shirı bastaǵan kartopty aparyp tókken. Atalǵan ónim asqa paıdalanýǵa jáne malǵa berýge jaramsyz. Onyń jalpy kólemi 2-3 tonnadan aspaıdy. Qalalar men aýdandardyń ákimdikteri qoqys alańdarynyń barlyǵyn tekserip shyqty. Egov.press telegram arnasynda jarıalanǵan beınejazbadaǵydaı iri kólemdegi kartop kezdespedi. Bul vıdeo shyndyqqa sáıkes kelmeıdi jáne ol bizdiń oblys aýmaǵynda túsirilmegen» dep habarlady basqarmadan.

Byltyr Ertis-Baıan óńiriniń fermerleri 806,4 myń tonna «ekinshi nan» jınap, onyń aldyndaǵy jylǵy rekordy birden 133 myń tonnaǵa jańartty.

Alaıda munshama asta-tók kartopty qaıda jibererlerin bilmeı basy qatqan.

Mol ónimdi arzanǵa satyp, kóptegen sharýashylyqtar shyǵynǵa da batty.