Kerbulaq aýdanynyń polıtsııasy Almatydaǵy tártipsizdik kezinde dúken tonaǵan turǵyndy anyqtady

TALDYQORǴAN. QazAqparat- Jedel izdestirý sharalary barysynda Almaty oblysynyń Kerbulaq aýdanyndaǵy polıtsııa bóliminiń qyzmetkerleri qańtar aıynyń basynda Almatydaǵy jappaı tártipsizdik kezinde dúkenderge shabýyl jasap, ózgeniń múlkin zańsyz ıelengen kúdiktini Qaspan aýylynan quryqtady, dep habarlaıdy QazAqparat tilshisi.

«Atalǵan derek boıynsha QR Qylmystyq kodeksiniń 191-babyna sáıkes sotqa deıingi tergeý amaldary júrgizilýde. Kúdiktiniń mekenjaıynan 5 dana telefon, planshet, birneshe qol saǵat, qulaqqaptar, mıkrofleshkalar men «Bılaın» abonetteriniń nómirleri tabyldy. Tabylǵan zattar tárkilenip, is materıaldaryna aıǵaqzat retinde tirkeldi»,- dedi Kerbulaq aýdany PB bastyǵy polıtsııa podpolkovnıgi Erbol Ahmetqalıev.

Polıtsııa basshysynyń aqparaty boıynsha iske qatysy bar degen kúdikpen ustalǵan 1998 jyly týǵan azamat buǵan deıin qylmystyq jaýapkershilikke tartylmaǵan.

Almatyǵa jumys jasaýǵa barǵan ol tártipsizdikter oryn alǵanyn paıdalanyp, «Aport» saýda úıindegi dúńgirshekterdiń birinen tárkilengen zattardy zańsyz ıemdenip ketken.

Tártip saqshylarynyń bultartpas aıǵaqtarynan keıin kúdikti qylmysyn tolyq moıyndap, zańǵa qaıshy áreketi úshin ókinetinin jetkizgen. Onyń áreketine sot organdary naqty baǵa beretin bolady.

Sonymen qatar, polıtseıler onyń osyǵan uqsas qylmystarǵa qatysy baryn tekserýde.