Keptirilgen 6 kg marıhýana: Aqmola oblysynda aýyl turǵyny úıinde esirtki saqtaǵan

Esil aýdanynyń Internatsıonalnoe aýylynda 50 jastaǵy turǵynnyń úıinde iri kólemde esirtki zaty tabyldy, dep habarlaıdy QazAqparat tilshisi Aqmola oblysty PD baspasóz qyzmetine silteme jasap.

Vedomstvonyń málimetinshe, qylmys respýblıkalyq «Qarasora 2023» jáne «Kanal-tosqaýyl» jedel aldyn alý sharalary barysynda anyqtalǵan.

«50 jastaǵy er adamnyń sharýashylyq ǵımaratyn tekserý kezinde ósimdik tektes esirtki zaty tabyldy. Saraptama qorytyndysy boıynsha tabylǵan zat 6 kg keptirilgen marıhýana bolyp shyqty. Sonymen birge, 175 buta qarasora tabyldy», - dedi vedomstvodan.

PD baspasóz qyzmetinen atap ótkendeı, er adam quramynda esirtki zaty bar ósimdikterdi óz betinshe ósirgen. Tárkilengen ónim onyń «egisiniń» bir bóligi ǵana. Qazirgi ýaqytta bul málimet tekserilip jatyr.

«Tabylǵan esirtki zattaryna baılanysty Qylmystyq kodekstiń 296-babynyń 4-bóligi (esirtki quraldaryn zańsyz saqtaý) boıynsha sotqa deıingi tergeý amaldary qolǵa alyndy», - dep tolyqtyrdy vedomstvodan.

Aıta ketsek, budan buryn Aqmola oblysynda balalardy shańǵy sportyna baýlyǵan jattyqtyrýshy esirtkimen ustalǵanyn jazǵan edik.