Kepilsiz nesıe alýshy neni bilý kerek - Qazaqstan bankterine sholý
Sonymen, jurtqa qyzmet kórsetetin ekinshi deńgeıli bank ataýlyda eki túrli nesıe bar: kepildi jáne kepilsiz. Kepildi nesıe degenińiz - belgili bir jyljymaıtyn hám jyljymaly múlikti (úı, páter, avtokólik) kepilge qoıyp, qaryzǵa aqsha alý. Ipoteka da osy sanatqa jatady. Bizdiń búgin sóz etpegimiz - kepilsiz nesıe. Bir jaqsysy ony kez kelgen qarjy uıymy beredi. Qazaqstan bankteri beretin kepilsiz nesıeniń maksımaldy mólsheri men merzimin kestede kórsettik. Egjeı-tegjeıli eskertý tómende.
Kepilsiz nesıe qalaı beriledi?
|
Bankter |
Beriletin somanyń maksımaldy mólsheri (teńge) |
Paıyzdyq mólsherlemesi |
Beriletin merzimi |
Baılanys (uıaly telefonnan qońyraý shalý tegin) |
Eskertý |
|
Eýrazııalyq bank |
5 mln |
12-38 % |
4 jyl |
7722 |
|
|
Sberbank |
5 mln |
18 % |
4 jyl |
5030 |
|
|
Bank RBK |
2 mln |
22-26 % |
3 jyl |
7888 |
|
|
Kazkommertsbank |
6 mln |
15-16% |
5 jyl |
7111 |
|
|
ATF bank |
5 mln |
16% |
3 jyl |
2424 |
|
|
Nurbank |
5 mln |
24% |
5 jyl |
2552 |
|
|
Kaspi Bank |
1 mln |
20,99% |
4 jyl |
9999 |
|
|
ForteBank |
5 mln |
--- |
5 jyl |
7575 |
Bul jalaqyny osy bankten alatyndar úshin.Jalaqysyn basqa bankten alatyndar úshin tek 3 mln teńge beriledi. |
|
Bank TsentrKredıt |
2-4 mln |
21-31 % |
4 jyl |
505 |
Bul jalaqyny osy bankten alatyndar úshin. Jalaqysyn basqa bankten alatyndar úshin tek 2 mln teńge beriledi. |
|
Qazaqstan Halyq Banki |
5 mln |
20 % |
4 jylǵa deıin |
8 8000 8000 59 |
Bul jalaqyny Halyq bankten alatyndar úshin. Jalaqysyn basqa bankten alatyndarǵa 24 paıyzben tek 500 myń teńge beriledi jáne alýshynyń jasy 25-ke tolǵan bolýy kerek. |
Álbette bank bitken mıllıondaǵan somany eldiń bárine birdeı bermeıtini taǵy anyq. Biz bilgen esep boıynsha qolǵa alatyn aılyǵyńyz 140 myń bolsa kez kelgen bankten shamamen 2 mln, 160-170 myń bolsa 3 mln resimdeýge múmkindigińiz bar. Al 5 mıllıon alý úshin eńbekaqyńyz 250 myńnan joǵary bolýy shart. Ádette nesıeniń aılyq tólemi eńbekaqyńyzdyń teń jartysyn quraıdy.
Bul bankterdiń barlyǵynyń derlik talaptary men sharttary uqsas, beretin somalary da shamalas. Arasynda tek Kaspi Bank nesıeni qolma-qol resimdep, aqshany 30 mınýtta alaqanyńyzǵa salady. Basqasy ótinimdi 2-3 kún qaraıdy.
Aı saıynǵy tabysyn rastamaǵan adamdar úshin eki bank kepilsiz nesıe beredi. Biri - Bank TsentrKredıt, ekinshisi - Kaspi Bank. Resmı túrde jumys istemeıtin kez kelgen adam atalǵan eki bankten de 300 myń teńge resimdeı alady. Tek Bank TsentrKredıttiń paıyzdyq ústemesi tómenirek bolatynyn eskerý kerek.
Endigi suraq - qarapaıym halyq neni bilýi kerek? Qarjylyq saýaty tómen azamattar bankke utylmaýy úshin qandaı máseleni qaperde ustaǵany abzal?
1-eskertý. Buny qatań este ustańyz! Belgili bir merzimge nesıe alǵanda qaryzǵa alǵan aqshańyzdyń ústinen tóleıtin tólemin (ústeme - pereplata) mindetti túrde eseptetip alyńyz. Shynynda bul paıyzdyq mólsherlemeden de mańyzdy. Sebebi bázbir bankterdiń paıyzy tómen bolǵanymen, siz ben biz bilmeıtin «jasyryn» komıssııalary men kórinbeıtin shyǵyndaryn tyqpalap, aqyry bankke quıatyn qarajatyńyz odan eki ese asyp túsedi. «Jumyrtqadan jún qyrqatyn» qarjy uıymdarynyń esepten eshqashan utylmaıtynyn umytpańyz. Eń durysy - ár banktiń ústemesin saýsaqtap turyp sanap, neǵurlym tómenin tańdaý.
2-eskertý. Kez kelgen bankke ótinim bere barǵanda alǵan qaryzdy merziminen buryn óteý sharttaryn táptishtep suraý kerek. Sebebi birde-ekili bankte alǵan qaryzdy alty aıǵa deıin nemese bir jylǵa deıin merziminen buryn jabýǵa bolmaıtyny týraly talap bar. Ne bolmasa merziminen erte japsańyz, saqtandyrý somasyn moıynǵa ilýi múmkin. Máselen byltyrǵa deıin Eýrazııalyq bankte alǵan qaryzdy alty aıǵa deıin merziminen buryn jabýǵa bolmaıtyn. Al qazir bul talapty alyp tastaǵanymen, saqtandyrý somasyn tóletedi.
3-eskertý. Nesıe alýǵa nıettenseńiz, eń aldymen, ózińiz jalaqy alatyn bankke baryńyz. Sebebi ár bank óz tutynýshysyna jeńildik jasaıdy. Oǵan dálel joǵaryda aıtqan Qazaqstan Halyq Banki. Óz klıentterine bes mln berse, ózgelerge bes júz-aq myń beredi. Bank TsentrKredıt pen Sberbankte de jalaqyny ózinen alatyn klıentter úshin 1% jeńildik bar. Ári kez kelgen bank klıentiniń eńbekaqy esebi «kóz aldynda» bolǵandyqtan qaryzdy da kóbirek berýi bek múmkin.
4-eskertý. Lajy bolsa jańadan ashylyp jatqan nemese ashylǵanyna kóp bola qoımaǵan bankterge jolamaǵan abzal. Mundaı qarjy uıymdary klıentterdi tartý úshin nebir kóz arbaýshy jeńildikter usynady. Mysal úshin sizdiń jańa jumys ornyndaǵy eńbek ótilińiz ben jalaqyńyz jetpese de, tipti esh jerde turaqty jumys istemeıtin bolsańyz da, talapqa saı kelmeıtin anaý-mynaý kemshiligińizge kóz jumyp, suraǵan somańyzdy tyqpalaýy múmkin. Rasymen júıkeńizdi juqartpaıdy, kóp qujat suramaı-aq, artyq suraq qoımaı-aq qolma-qol resimdep, aqshany shytyrlata sanap beredi. Esesine eki-úsh ese ústeme moınyńyzǵa ilinedi. Alǵanǵa máz bolmańyz, óıtkeni ońbaı tutylýyńyz ábden múmkin.
5-eskertý. Kestede kórsetilgen bankterdiń birazy nesıe resimdeýdiń eki jolyn usynady: komıssııamen jáne komıssııasyz. Birinshisinde bank nesıe bergeni úshin resimdegen somanyń 5 paıyzyn ustap qalady. Máselen siz Bank TsentrKredıtten 3 jylǵa 3 mln teńge almaqsyz delik. Eger komıssııasyn ustap qalsyn deseńiz qolyńyzǵa shamamen 2 850 myń teńge tıedi. Esesine nesıeni 21 paıyzben alasyz. Al eger 3 mıllıondy qolyńyzǵa tutas alamyn deseńiz 31 paıyzben beredi. ıAǵnı úsh jylda tóleıtin paıyzdyq ústeme anaǵurlym joǵary bolady degen sóz. Túsinikti tilmen aıtqanda kez kelgen bank jańaǵy 5 paıyzdy ne birden ustaıdy, ne nesıeni tóleıtin merzimde eki-úsh ese artyǵymen óndirip alady. Sondyqtan qashanda qaperińizde bolsyn, nesıe alǵanda komıssııasymen resimdeńiz. Birneshe ese artyq tólegenshe, alatyn somańyzǵa qaraı bes paıyzyn birden ustap qalǵany jaqsy.
6-eskertý. Joǵaryda kórsetilgen bankterdiń paıyzdyq mólsherlemeleri sizdiń nesıe tarıhyńyzǵa, alatyn somańyz ben beriletin merzimine qaraı, ıaǵnı, ár adamnyń jaǵdaıyna qaraı ár túrli esepteledi. Senimdi klıent bolsańyz jeńildikter de kóbeıe bermek.
P.S: Támam banktiń jedel jelisin tekke jazbadyq. Ár bankti aralap júrýge ýaqytyńyz bolmasa, utylmas úshin uıalyńyzdan tegin qońyraý shalyp, operatorlarynan keńes alyńyz. Jeke derekterińizdi aıtsańyz sizge qansha soma beriletinin, merzimi men ústemesin, aı saıynǵy tólemin eki tilde túsindirip beredi. Tipti saıttary arqyly ótinim qaldyryp, aqshany bir-eki kúnnen keıin alyp ketýge de bolady.