Kenjehan Matyjanov: Abaı – ultymyzdyń rýhanı temirqazyǵy

ALMATY. QazAqparat – Memleket basshysynyń «Abaı jáne HHІ ǵasyrdaǵy Qazaqstan» atty maqalasyna oraı Muhtar Áýezov atyndaǵy ádebıet jáne óner ınstıtýtynyń dırektory Kenjehan Matyjanov óz oıyn bildirdi, dep habarlaıdy QazAqparat tilshisi.

Kenjehan Matyjanovtyń pikirinshe, Memleket basshysy Qasym-Jomart Toqaevtyń «Egemen Qazaqstan» gazetinde jaryq kórgen maqalasy uly oıshyl Abaıdyń 175 jyldyq mereıtoıyn álemdik deńgeıde atap ótýdiń tujyrymdamalyq negizi ispetti.

Sondaı-aq, ol Abaıdyń áleýmettik, rýhanı tujyrymdary qazaq úshin qashanda adastyrmaıtyn temirqazyq ekenin atap ótti.

«Abaı – ultymyzdyń rýhanı temirqazyǵy. Jyldyń basy QR Prezıdenti Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasymen bastalýy bizdiń rýhanı ómirimizdegi úlken qubylystyń biri. Bul – tereń oıdy qozǵaǵan, óte salmaqty maqala dep esepteımin»,– deıdi Kenjehan Matyjanov

Onyń aıtýynsha, el Prezıdentiniń Abaıǵa erekshe nazar aýdarǵanynda úlken mán bar.

«Ómir úlken kól, zamana soqqan jel»,- degen oıshyl Abaı. Ýaqyt ótken saıyn Abaıdy kezeń-kezeńmen tanyp kelemiz. Abaıǵa árqashan jańa turǵydan oralyp kelip otyramyz. Bıylǵy 175 jyldyq mereıtoı ózgeshe bolmaq. Uly Abaıdyń bizge ósıet etip ketken dúnıesi osy eldiń erkindigi, halyqtyń bostandyǵy emes pe? Meniń oıymsha Abaı bizdiń ulttyq bolmysymyzdyń úlken bıigi, sondyqtan Abaıdy jańasha taný kerek jáne ony jas urpaqqa jańasha túsindirý qajet. Biz Abaı kórsetken uly joldan, Abaı kórsetken adamgershilik, ulttyq nysanadan aýytqymaýymyz kerek»,–deıdi til mamany.

Foto: bilimdinews.kz