Kenjebek Shaıqaqovtyń «Aıqaı» fılmi Frantsııanyń halyqaralyq kınofestıvalinde Gran-prı jeńip aldy
Ulttyq kınony qoldaý memlekettik ortalyǵynyń málimetinshe, kartına buǵan qosa Orta Azııa kınosynshylarynyń «NETPAK» júldesin jáne Mark Haas atyndaǵy arnaıy syılyqty da ıelengen.
Sondaı-aq, fılmde basty rólderdi somdaǵan Orynbek Shaımaǵambetov pen Arnur Akramǵa qazylar alqasynyń arnaıy dıplomy tabystaldy.
Osylaısha tórt birdeı júldege ıe bolǵan «Aıqaı» tóreshilerdi tánti qylǵan tańdaýly fılmderdiń biri retinde Vezýl kınofestıvaliniń tarıhynda qaldy.
Aıta keterligi, buǵan deıin Ońtústik Koreıada 4-13 qazan aralyǵynda ótken áıgili Pýsan kınofestıvalinde atalǵan qazaqstandyq kartına A Window on Asian Cinema baǵdarlamasynda kórsetilip, tusaýy kesilgen bolatyn.
Sonymen qatar, «Aıqaı» qarasha aıynda Bishkek Halyqaralyq kınofestıvaline qatysyp, fılmniń rejısseri Kenjebek Shaıqaqov Qazylar alqasy usynǵan «Úzdik stsenarıı» nomınatsııasy boıynsha arnaıy júldeni ıelendi.
Esterińizge sala ketsek, Kınokartına QR Mádenıet jáne sport mınıstrliginiń tapsyrysy boıynsha «Ulttyq kınony qoldaý memlekettik ortalyǵy» KEAQ qoldaýymen túsirilgen.
«Fılmde kúlli qazaqtyń qasireti bolǵan „Semeı polıgony“ qurbandarynyń taǵdyry ıadrolyq jarylystan zardap shegip, qos aıaqsyz dúnıege kelgen azamattyń ómiri arqyly beınelenedi. Jarynan aıyrylǵan jalǵyzbasty er adam men jarymjan ákesine janashyr, qamqor bola bilgen balanyń kúıbeń tirshiligi arqyly rejısser 1980-90 jyldardaǵy halyqtyń jaǵdaıyn kórsetedi» — delingen habarlamada.
Kórkem fılmniń túsirilimi Abaı oblysy, Aıagóz aýdany, Shyńǵoja aýylynda ótken.
Rejısserdiń aıtýynsha, kartınada basty róldegi Melis atty keıipkerdi kásibı akter emes, rasynda eki aıaǵynan aıyrylǵan qyzylordalyq azamat — Orynbek Shaımaǵanbetov somdaǵan. Al Melistiń mektep qabyrǵasynda oqıtyn uly — Jalǵastyń rólin Almaty oblysy Qarasaı batyr atyndaǵy mekteptiń 7 synyp oqýshysy Arnur Akram oınaǵan.
Sondaı-aq, qosalqy rólderde belgili akterlar Erbolat Álqojaev, Beınur Baımuhambetov, Erlan Malaev, Aıbek Imanqulov, Aıǵanym Nursultan boı kórsetedi.
«Fılmniń túsirilim kezeńi 2022 jyldyń qazan aıynda aıaqtalyp, 2023 jyldyń naýryz aıynda montaj kezeńi bastaldy. Maýsym aıynyń sońyna deıin sozylǵan montaj kezeńinde fılmniń túsi óńdelip, qaıta dybys jazý, kompıýterlik grafıka, dybys árleý jumystary júrgizilgen. Fılmniń sońǵy nusqasy Memlekettik Ulttyq Kınony qoldaý ortalyǵynyń ekspertti keńes ókilderine 26-maýsym kúni kórsetilip, bekitildi» — deıdi rejısser Kenjebek Shaıqaqov.
Fılmniń rejısseri jáne stsenarıı avtory — Kenjebek Shaıqaqov 2014 jyly «Amanat kz» prodıýserlik ortalyǵynyń qarjylandyrýymen «DSfilm» kınostýdııasynda debıýttik «Kúrkó» atty fılmin túsirgenin eske sala ketken abzal. Atalǵan kınokartına da birneshe halyqaralyq kınofestıvalderde júldeli oryndar ıelengen.