Kenjebek Oljabaı Taraz qalalyq máslıhatynyń tóraǵasy bolyp saılandy

TARAZ. QazAqparat – VIII shaqyrylym depýtattarynyń Taraz qalalyq máslıhatynyń birinshi sessııasy ótti, dep habarlaıdy QazAqparat tilshisi.

Sessııaǵa qala ákimi Baqytjan Orynbekov, memlekettik jáne atqarýshy organdardyń basshylary qatysty. Alǵashqy sessııany qalalyq saılaý komıssııasynyń tóraǵasy Aryn Asqarbekov ashty.

«Saılaýǵa Taraz qalalyq máslıhatynyń bir mandattyq aýmaqtyq saılaý okrýgteri boıynsha 82 kandıdat tústi. Olardyń 27-si depýtat bolyp saılandy. Jańa saılanǵan depýtattardyń 20-sy er azamat, 7-eýi áıel. 4 depýtat 35 jasqa deıingi bolsa, 23 depýtat 35-63 jas aralyǵynda. Depýtattyq korpýstyń ortasha jasy 44 jasty qurady. Olardyń arasynda 6 ınjener, 5 ekonomıst, 7 oqytýshy, 2 zańger, 3 medıtsına salasynyń qyzmetkeri jáne 4 basqa mamandyq ıeleri bar», - dedi qalalyq saılaý komıssııasynyń tóraǵasy.

Aıta keteıik, Taraz qalalyq máslıhat depýtattaryna bólingen 27 mandat tolyǵymen qamtyldy.

Segizinshi shaqyrylǵan qalalyq máslıhattyń tóraǵasy bolyp biraýyzdan Kenjebek Oljabaı saılandy.

Sessııa sońynda qala ákimi Baqytjan Orynbekov jańadan saılanǵan depýtattardy quttyqtap, aldaǵy jumystaryna sáttilik tiledi.

Buǵan deıin Taraz qalalyq máslıhatyna kimder ótkenin jazǵan bolatynbyz.