Kentaýlyq ustazdyń úıinde 48 eldiń tıyny saqtaýly tur
Kentaý qalasynyń turǵyny Erlan Baımenov tıyn jınaýmen áýestenedi. Stýdent kezden bastalǵan kollektsııaǵa degen qyzyǵýshylyǵy, keıin hobbıine aınaldy. Qazir úıinde 48 memlekettiń tıyndary saqtaýly tur. Olardyń ishinde álem kartasynan joıylyp ketken elderdiń de aqshasy bar.
«Murat Tastanbekov esimdi aǵaıym birde tarıh sabaǵyna óziniń jınaǵan tıyndaryn alyp kelip tanystyrdy. Sodan bastap meniń de tıyn kollektsııasyn jınaýǵa degen qyzyǵýshylyǵym artty»,-deıdi ustaz.
Erlan kóbinese tıyndardy jarnamalyq saıttardan satyp alady. Odan bólek, bazarlar men jaımalardyń qyzmetin tutynady. Al, hobbıin biletin tanystary men týystary, dostary ózderinde bar sırek tıyndardy syılap ketetin kezderi kóp. Qazir úıdegi kollektsııasy 5 keliden asady. Olardyń ishinde kóne tıyndarmen qatar, sırek kezdesetin aqsha túrleri de bar.
«Uly Jeńistiń 70 jyldyǵyna oraı shyqqan 500 teńgelik bar. Jaqynda bir kúmis tıyn satyp aldym. Sondaı-aq, elimiz egemendigin alǵan jyldar ishinde quıylǵan tıyndar men jaryq kórgen aqshalardy kollektsııama qosym qoıdym»-deıdi ol.
Qazirgi kezde Erlan Anýaruly Kentaý qalasyna qarasty Hantaǵy aýylyndaǵy A. S. Pýshkın atyndaǵy mekteptiń dırektory. Odan bólek, Saýran aýdandyq máslıhatynyń depýtaty. Búginde halyq qalaýlysy aýdan aýmaǵyndaǵy máselelerdi sheshýge belsendi túrde atsalysyp keledi.