Kentaýlyq turǵyn jastaıynan jetim qalǵan káris, ózbek, orys ultynyń balalaryn baýyryna basty
Kentaý qalasynyń turǵyny Túımegúl Ergeshqyzy ata-anasynan erte aırylǵan 10 qyz ben 8 uldy qamqorlyqqa alǵan. Olardyń ulttary da ártúrli. Atap aıtar bolsaq, bireýi orys, bireýi ózbek, endi biri káris ultynan.
Qalǵandary qazaqtyń qarakózderi. Bir shańyraq astynda tatý-tátti turyp jatqan ár ult ókiliniń balalaryn kórgende Túımegúl apaıdyń úıi «shaǵyn assambleıa» ispetti kórinedi.
«Ómir osynysymen mańyzdy, maǵynaly. Ózim balajanmyn. Jetim balalardyń bireýdiń qolyna jáýteńdep, qarap júrgenin kórgende júregim aýyrady. Shydaı almaımyn. Sondyqtan bala asyrap alamyn degen sheshimge keldim. Maǵan balalar ártúrli jaǵdaıda keldi. Birin dúnıege kele salysymen qolyma alsam, endi birin 1,5 jasynda, bireýin es biler eresek shaǵynda qamqorlyǵyma aldym», – deıdi Túımegúl Ergeshqyzy.
Turǵyn úıde balalardyń jattyǵý jasaýyna, sabaq oqýyna, bos ýaqyttaryn tıimdi ótkizýine, demalýyna arnalǵan arnaıy bólmeler bar. Qajetti jıhazdarmen jabdyqtalyp, kórnekiliktermen qamtamasyz etilgen. Aýlada búldirshinder úshin oıyn quraldary ornatylǵan. ıAǵnı, árbir balanyń qalypty azamat bolyp ósýine barlyq jaǵdaı jasalǵan.
«Balalar úıine barsam júregim aýyrady. Barlyq balalardy asyrap alǵym kelip turady», – deıdi qamqor jan.
Búginde Túımegúl Ergeshqyzy uldyń úlkeni Qaısardy úılendirip, enshisin berdi. Al, boıjetken eki qyzyn toı jasap uzatty. Sondaı-aq, eki qyzy stýdent bolsa, bir uly áskerden Otan aldyndaǵy boryshyn ótep keldi. Qalǵany mektepte oqyp júr. Nurqanat esimdi uly qarashańyraqqa bas bolyp otyr. Ul-qyzdarynan súıgen nemereleri de bar.
«Uldarymnyń barlyǵyn súndetke otyrǵyzyp, toı jasap berdim. Qazir kúndelikti tirshilikte qolǵabys etýde. Barshasy boı jetip, er jetip úlken ómirge qadam basyp jatyr. Olar da bir-birine baýyrmal. Nemerelerim de ósip keledi. Solardyń tátti qylyǵyn tamashalap júrip, kúnniń qalaı ótkeninde bilmeı qalamyn»-deıdi ol.
Jalpy altyn júrekti ana bala asyrap alýdy 33 jasynda bastaǵan. Alǵashqy qyzyn qolǵa alǵan sátinde úlken áserge bólenipti. Sodan jyl saıyn otbasy músheleri kóbeıe túsken. Іlgeride balalarǵa qaraý, jetildirý qıyndyq týdyrǵanymen, keıin qalyptasyp ketken. Degenmen, ol «18 balany qamqorlyqqa alamyn dep oılamaǵanmyn» - deıdi.
«Ómirimniń mánisi - ózgege jaqsylyq jasaý» - dep biletin qamqor jannyń basty maqsaty – búldirshinderin qatarynan kem qylmaı ósirý, úlken azamat etip tárbıeleý.
«Barlyǵy Allanyń qalaýymen boldy. Men baqyttymyn. Men balalarymmen baqyttymyn» - deıdi altyn júrekti ana.