Kentaýlyq túlek UBT-dan eń joǵary upaı jınady

<p>TÚRKІSTAN. KAZINFORM - Kentaýlyq talapker Aıdos Qojanov Ulttyq biryńǵaı testileýden 138 upaı jınady. Bul kórsetkish ázirge elimiz boıynsha eń joǵary nátıje.</p>

Aıdos Qojanov ıÝrıı Gagarın atyndaǵy №16 mektep-lıtseıinde 10 jyl boıy bilim alǵan. Al, 11 synypty «Grant» mektebinde bitirdi. Jas túlek bolashaqta matematıka pániniń muǵalimi bolǵysy keledi. Qazir bul baǵytta kóp oqyp, kóp izdenýde. Qalalyq, oblystyq jarystarǵa da qatysyp turady. Júldeli oryndardy ıelengen sátteri kóp. Ustazdary men ata-anasy da daryndy oqýshynyń bolashaǵynan úlken úmit kútedi.

Ulttyq testileý ortalyǵy usynǵan málimetterge toqtalar bolsaq, negizgi UBT bastalǵaly beri 1 maýsymǵa deıin 71 myń túlek test tapsyrǵan. Eń joǵary 137 baldy úsh adam jınaǵan. Al, talapkerlerdiń 74 paıyzy – shekti baldan ótken.

«Ereje buzǵany úshin 126 adamnyń nátıjesi joıyldy. Atap ótsek, smartfon, shpargalka jáne basqa da tyıym salynǵan zattardy alyp ótý áreketi saldarynan 94 talapker test tapsyrý múmkindiginen aıyryldy. Testileý kezinde erejelerdi buzǵany úshin aýdıtorııadan 27 adam shyǵaryldy, beınejazbalardy tekserýden soń ereje buzǵan 5 adamnyń nátıjesi joıyldy» - delingen ulttyq testileý ortalyǵy taratqan aqparatta.

Aıta keteıik, Túrkistan oblysynda 2023-2024 oqý jylynda Ulttyq biryńǵaı testileýge qatysýǵa jalpy 27 340 oqýshy ótinim bildirgen.