Kentaýlyq oqýshynyń Qulsaryǵa jibergen qarjysy aýdandyq mýzeıge qoıyldy

<p>ATYRAÝ. KAZINFORM &ndash; Kentaýlyq oqýshy qyzdyń aqsha salynǵan qutysy Qulsary qalasyndaǵy mýzeıge qoıyldy.</p>

Jylyoı aýdany ákimdiginiń aqparatyna qaraǵanda, kentaýlyq oqýshy Gaýhar Shaımerdenniń aqsha salǵan qutysy gýmanıtarlyq kómekpen birge jetkizilgen. 

«Túrkistan oblysyndaǵy Kentaý qalasynyń kishkentaı turǵyny Gaýhar Shaımerden aqsha jınap júrgen qutysyn tasqyn sýdan zardap shekken Qulsarynyń turǵyndaryna jiberdi. Ol bul qutyǵa 1 jyl boıy aqsha jınaǵan. Teledıdardan tasqyn sý basqan Qqlsary kórip, bar jınaǵyn qulsarylyqtarǵa jiberýge sheshim qabyldaǵan. Bul — kishkentaı qazaqstandyqtardyń otanshyldyq seziminiń sımvoly» dep habarlady aýdandyq ákimdikten. 

Foto: Jylyoı aýdany ákimdigi

Qulsary qalasynyń turǵyndary Gaýhar Shaımerdenniń qarjysyn jumsamaýdy uıǵarǵan.

Onyń aqsha salynǵan qutysy aýdandyq «Atamura» mýzeıine qoıyldy. 

Onymen birge taǵy bir balaqaı — Jiger Jambyldyń amanaty da atalǵan mýzeıde saqtalady. 

Eske sala keteıik, 11 jasar kentaýlyq qyz jyl boıy jınaǵan qarajatyn Qulsaryǵa kómek retinde bergen bolatyn.