Kentaýlyq kópbalaly ana transformator qurastyrady
Jalpy transformator shyǵaratyn zaýytta qyzmet etý ekiniń biriniń qolynan kele bermeıtin is. «Tars-turys» etken stanok daýystarynyń arasynda júrip, túrli maıdyń ıisimen tynystaýǵa kópshilik shydaı bermesi anyq. Odan bólek, qatal tártip pen tehnıkalyq qaýipsizdikti saqtaý degen talaptyń da údesinen shyǵa bileý qajet.
Al, názik jandylar úshin bul óte aýyr eńbek ekenin aıtpasaq ta túsinikti. Tań atqannan kún batqanǵa deıin eńbek etip júrgen aıaýly arýlar, keshkisin otbasy oshaq qasynan tabylatyny taǵy bar. Mine, osyndaı aýyr eńbekti eńserip júrgen jannyń biri Halıla Іzbasarova.
Kópbalaly ana Qazaqstandaǵy mashına shyǵaratyn transformator zaýytyndaǵy eńbegimen maqtanady. Tynymsyz eńbek pen uqyptylyqty talap etetin jumysynda syıly, ári kópke úlgili. Ujymdastarynyń aldynda abyroıly.
«Jalpy kópshilik áıel adamy úshin zaýytta jumys isteý qıyn dep túsinedi. Degenmen de ózińe unaǵan jumystyń qıyndyǵy bolmaıdy. Sondaı-aq, kóńiliń qalaǵan jumysqa eshkim de kedergi bola almaıdy. Men óz jumysymdy jaqsy kóremin. Erlermen ıyq tıistirip zaýytta eńbek etý men úshin úlken maqtanysh. Ári, az ǵana eńbegimizben Kentaý qalasynyń damýyna, transformatorlardyń shet elge eksporttalýyna úles qosyp kelemiz. Eń bastysy - transformatorlardan halyq jaryq alyp otyrǵanyn kórgende ózimdi baqytty sezinemin» - deıdi eńbek adamy.
Halıla Іzbasarova alǵashqy eńbek jolyn 1984 jyly Kentaý qalasyndaǵy Tigin fabrıkasynda tiginshi bolyp bastaǵan. Al, 1985 jyly bir mektepte oqyǵan Aımahan Іzbasarovpen shańyraq kóterdi.
1986 - 1993 jyldar aralyǵynda «Aşysaıtústimetall» kombınatynyń «Romashka» balalar baqshasynda tárbıeýleýshiniń kómekshisi qyzmetin atqardy. 1993 jyldan
2003 jyldar aralyǵynda otbasylyq jaǵdaımen Monǵolııaǵa qonys aýdardy. Onda jubaıy qyzmet etse, ózi bala tárbıesimen shuǵyldandy.
2007 jyly týǵan jerge qaıta oraldy. Sodan «Kentaý transformator zaýyty» aktsıonerlik qoǵamynyń №2 tsehyna transformatorlar ózegin oraýshysynyń oqýshysy qyzmetine ornalasty. Keıin eńbekqorlyǵymen qyzmette joǵarylaı tústi. Arada biraz ýaqyt ótkende oǵan úshinshi dárejeli transformatorlar ózegin oraýshy degen jaýapkershilik júkteldi.
«Árıne, qaladaǵy jalǵyz transformator zaýytyna jumysqa ornalasý osyndaǵy jergilikti turǵyndardyń arman, maqsaty bolatyn. Degenmen, aýyr jumysqa shydamaǵan jandar da kóp boldy. Alǵashqyda, 17 jyl buryn jumysqa ornalasqan kezimde men de kóp nárseni bilmeıtin edim. Bilikti de, bilimdi áriptesterim men ustazdarymnyń qasynda júrip tájirıbemdi shyńdadym. Úırendim. Biliktiligimdi arttyrdym. Qazirgi tańda ózim de shákirt tárbıelep kelemin. Olarda osynda eńbek etip jatyr. Shákirterimniń jetistigin kórgende qatty qýanamyn», - deıdi H. Іzbasarova.
Ol eńbek jolynda kóptegen marapatqa qol jetkizgen. Zaýyt basshylyǵynyń atynan birneshe ret alǵys hatpen marapattalǵan.
«Kentaý transformator zaýyty – elektr energetıkasy, mashına jasaý salasyndaǵy biregeı kásiporyn. Zaýyt shyǵaratyn ónimder halyqaralyq sapa jáne qaýipsizdik standartyna saı keledi. Sonymen qatar, bizdiń zaýyt sapaly transformatorlarmen qatar energııa únemdeıtin transformatorlardy da shyǵarady», - dedi ol.
Jumysyn adal atqaratyn Halıla Іzbasarova jaýapty jumysshy retinde áriptesteri arasynda qurmetine bólengen jan. Al, úıde nemere jubatyp otyrǵan kópbalaly ana. Búginde bes qyz ben bir uldy tárbıelep ósirdi. Qazir nemere súıip otyr. Ul-qyzdaryna barlyq otbasylyq qundylyqty meńgertken. Úlkenge qurmet, kishige izetin qaraıtyn balalary da joǵary oqý oryndaryn bitirip, óz mamandyqtarymen qyzmet etip keledi.
«Eńbek adamdy ósiredi. Eńbek etken adamnyń jaman bolǵanyn kórgen emespin. Eńbek adamyna eldiń yqylasy erek. Al, taza eńbektiń nany tátti. Sondyqtan, ul-qyzdaryma, nemerelerime árdaıym bilim alyńdar, eńbek etińder dep keńes berip, aqyl aıtyp otyramyn» - deıdi Halıla Іzbasarova.