Kentaýdyń eks-ákimi Rashıd Aıýpov sot aldyndaǵy sońǵy sózin aıtty
«Men Qazaqstannyń zańdaryn eshqashan buzbaǵan qarapaıym azamatpyn. Eshqashan adamdardy jaıdan jaı aıyptap, sottaıdy dep oılamappyn. Sot protsesi kezinde meni qamaýǵa alýǵa negiz bolǵan joq. Antıkordyń qyzmetkeri maǵan moıyndatyp, basqa adamdardy otyrǵyzýǵa tyrysty. Osydan keıin men shyndyqtyń eshkimge kerek emesin túsindim. Áıteýir isti jabý kerek boldy. Prezıdentke jaǵdaıdyń múldem basqasha baıandalatyny túsinikti boldy. Olar qoqan-loqqymen, zorlyq-zombylyqpen, bopsalaýmen moıyndata almaǵannan keıin meni jaýyp tastady. Mende álgi bıznesmendi (Aıýpovqa kásipker Saıdýlla Qojabevty laýazymdy basshylarǵa para berýge ıtermeledi jáne tender alyp berem dep ýáde etken degen aıyp taǵylǵan - red.) para berýge aıtaqtaýǵa múmkindik bolǵan da joq. Men ony tanymaımyn. Ulyn da bilmeımin. Biraq ózderi óte jaqsy biledi (Antıkor jáne prokýratýra). Biraq soǵan qaramastan olar isti jabýy kerek sııaqty. Alaıda, qurmetti sot, sózden basqa eshqandaı faktiler men dálelder joq ekenin jáne eshqashan bolmaǵanyn ózińiz kórdińiz ǵoı. Olar bárin ózderi oılap tapty», - dedi Rashıd Aıýpov sotta.
Protseste sottalýshy eshqashan qazynany tonaýmen aınalyspaǵanyn jetkizdi. Barlyq aıyp oıdan shyǵarylǵan.
«2012 jyldan bastap Ilon Masktyń kompanııasymen Qazaqstanda zaýyt salý múmkindigi týraly hat jazystyq. Elimizde ǵylymnyń damyp, álemdik aýqymdaǵy mamandyq paıda bolǵanyn qalaǵanmyn. Astana ákimdigimen hat almasý bar, bári saqtalǵan. Men eshqashan qazynany tonaýmen aınalysqan emespin. Munyń bári qujatta dáleldengen. Qurmetti sýdıa, siz izdegen adam men emes, siz qatelesesiz», - deıdi ol
Sýdıa habarlaǵandaı, aıyptyǵa sot úkimi shamamen 28 tamyz saǵat 16:30-de shyǵady.
Eske sala keteıik, bıyl 31 naýryzda Kentaýdyń eks-ákimi Rashıd Aıýpov elordada tergeý ızolıatorynda otyrǵanyn habarlaǵan edik.
Aıta ketsek, Rashıd Aıýpov ótken jyly naýryzda Túrkistan oblysy Kentaý qalasynyń ákimi bolyp taǵaıyndalǵan.
Al, 2019 jyldyń shilde aıynan 2021 jylǵa deıin Túrkistan qalasynyń ákimi qyzmetin atqardy.