Kentaýdaǵy jalǵyz jylý elektr ortalyǵy qatty tozǵan

NUR-SULTAN. QazAqparat – Túrkistan oblysy Kentaý qalasyndaǵy osydan 70 jyl buryn paıdalanýǵa berilgen JEO-5 jabdyqtary qazir 100% tozyp tur. Energetıka mınıstri Bolat Aqsholaqov óńirge jumys sapary barysynda ortalyqtyń jaǵdaıymen tanysyp, ákimdik tarapynan tıisti sheshimder qabyldanýy qajettigin aıtty, dep habarlaıdy QazAqparat vedomstvonyń baspasóz qyzmetine silteme jasap.

«Kentaý qalasyn turaqty jylýmen jabdyqtaý maqsatynda qala ákimdigi júıeni damytý perspektıvalary boıynsha sheshim qabyldaýy qajet», - dedi mınıstr.

Bolat Aqsholaqov «Kentaý servıs» MKK basshylaryna aldaǵy jylytý maýsymyn ótkizý úshin otynnyń normatıvtik qorymen qamtamasyz etý qajettigine erekshe nazar aýdarý kerektigin aıtty.

Atalyp ótkendeı, jergilikti atqarýshy organnyń jylytý maýsymyna daıyndyq úshin jyl saıyn bóletin qarajaty elektr stantsııalary men jylý jelileri jabdyqtarynyń aǵymdaǵy jóndeý jumystaryna ǵana jetedi. Máselen, ótken jyly jergilikti jáne oblystyq bıýdjetten 1,9 mlrd teńge bólingen, onyń 1,2 mlrd teńgesi kómir satyp alýǵa baǵyttaldy. Alaıda, JEO-5 jabdyqtary men jylý jelilerin jóndeýge 3,180 mlrd teńge qajet bolǵan.

Kentaý qalasynyń ákimdigi kóp qabatty turǵyn úılerge jeke gaz qazandyqtaryn ornata otyryp, tutynýshylardy qoldanystaǵy JEO-dan avtonomdy jylytýǵa aýystyrý arqyly qalany jylýmen jabdyqtaý júıesin damytýdyń balamaly nusqasyn usyndy. Balamaly jobanyń quny – shamamen 24,2 mlrd teńge.

Eske sala keteıik, 5 sáýir kúni mınıstrdi qabyldaǵan Prezıdent Qasym-Jomart Toqaev elimizdegi jylý energetıkalyq nysandarda apattardyń jıilep ketkenin aıtqan bolatyn .