Kentaýdaǵy kóp qabatty úılerdiń turǵyndaryna jylý men jaryq tólemderinen jeńildik jasalady

<p>TÚRKІSTAN. KAZINFORM - Kentaýdaǵy kóp qabatty úı turǵyndarynyń jylý men jaryq tólemderine jeńildik jasalady. Bul týraly jergilikti turǵyndarmen kezdesken Kentaý qalasynyń ákimi Jandos Tasov málimdedi.</p>

№5 jylý energo ortalyǵy tarapynan beriletin jylý men elektr energııasynyń tarıfterine qatysty máseleler talqylanǵan jıynǵa «Ońtústik Jaryq» JShS, «Energopotok» JShS, Túrkistan oblystyq tabıǵı monopolııalar retteý departamentiniń ókilderi, sala basshylary qatysty.

Qala ákimi Jandos Tasov jylý ortalyǵynda júrip jatqan qurylys jumystary jaıynda baıandady. Sondaı-aq, Kentaý qalasyndaǵy №5 Jylý energo ortalyǵynyń qazandyqtaryn qaıta qurý jumystaryna bólingen qarjy boıynsha aqparat kózderinde túrli «jalǵan aqparat» tarap júrgenin atap ótti.

«Kentaý qalasy №5 Jylý energo ortalyǵynyń jalpy 6 qazandyǵyn qaıta qurýǵa 13,7 mlrd. teńgege joba ázirlenip, 2024 jyldyń qańtar aıynda oblystyq bıýdjetten 2,7 mlrd. teńge bólingen. Bul qarjyǵa №8 jáne №11 qazandyqtarynda qaıta qurý jumystary júrgizilip jatyr»-dedi qala ákimi.

Sondaı-aq, Jandos Tasov jeltoqsan aıynda jylý energo ortalyqta bolǵan apat saldarynan birqatar kópqabatty turǵyn úılerdiń jylý júıelerinde aqaýlar paıda bolǵanyn jetkizdi. Sol sebepti, qys mezgiliniń úsh aıyndaǵy jylý tólemderinen 10-12 kúnnen jeńildik jasalatynyn túsindirdi.

Odan bólek, oryn alǵan tótenshe jaǵdaıǵa baılanysty, qala turǵyndarynyń jáne ákimdiktiń usynysymen, «Energopotok» JShS tarapynan jeltoqsan aıynda tutynýshylardyn 70 kVt alynyp, shegerildi. Qantar aıynda tólemderi 20 myń teńgeden asqan tutynýshylarǵa 100 kVt jeńildik qarastyryldy. Sonymen qatar, saralanǵan tarıfpen eseptelgen tólemderdi ortasha tarıfpen qaıta tómendetý jaǵyna qaıta esepter júrgizildi. Aqpan aıynnan bastap kópqabatty turǵyn úılerdiń turǵyndaryna saralanǵan tarıftiń 1 adamǵa shekti lımıti 70 kVt-tan 110 kVt-qa kóterilgeni aıtyldy.

Kezdesýde ózge de máseleler kóterilip, baqylaýǵa alyndy. Turǵyndar tarapynan elektr energııasyna qatysty «Ońtústik Jaryq» JShS, «Energopotok» JShS, Túrkistan oblystyq tabıǵı monopolııalar retteý departamentiniń ókilderine birqatar saýaldar qoıyldy.

Sonymen qatar bıyl Kentaý qalasynda júzege asyrylatyn ınvestıtsııalyq jobalar tanystyryldy. Atap aıtar bolsaq, 2024-2025 jylǵy jylytý maýsymynda turǵyndardy sapaly jylýmen qamtamasyz etý maqsatynda 4 qazandyqty qaıta qurý jumystary júrgizilýde. Qosymsha 14,5 shaqyrym magıstraldy jylý qubyryn jáne 81 shaqyrym ishki oram júıelerin aýystyrý jumystary atqarylady.

Aıta keteıik, buǵan deıin Kentaý qalasynyń turǵyndaryna jylý men jaryq baǵasy qaıta eseptelip berilýi qajettigin týraly QR Parlament Májilisiniń depýtaty Ulasbek Sádibekov másele kótergen bolatyn.