Kentaýda jyl basynan beri 2000-nan astam adam jumyspen qamtyldy
Bıyl joba aıasynda kásipkerlik negizderine oqytýmen 248 adam qamtyldy, onyń ishinde 199 adam oqýdy aıaqtap, sertıfıkat aldy. Budan basqa, jańa bıznes-bastamalardy iske asyrý úshin bıylǵy jyldyń basynan halyqtyń áleýmettik osal sanattaryna 400 AEK deıingi (1 476 800 teńge) mólsherde 81 grant berildi. Qaıtarymsyz qarjy utyp alǵan jannyń biri Kentaý qalasynyń turǵyny Symbat Anarbaeva analar men balalarǵa massaj jasaıtyn ortalyq ashty. Negizinde kásipker ana bul bıznesin 5 jyl buryn bastaǵan. Alaıda qajetti quraldary bolmaǵandyqtan qyzmet kórsetý baǵyty da az bolǵan. Búginde memlekettik baǵdarlamanyń arqasynda grant ıegeri kásibin ulǵaıtyp otyr.
«Ómirdiń synaqtaryna sabyrlyqpen tózip, oǵan kúlimdep qarasań, ómirdiń tamasha sátteri óte kóp bolady. Ózim erekshe bala tárbıelep otyrǵandyqtan, meniń ortalyǵymda mindetti túrde balaǵa massaj jasaıtyn qyzmet kórsetilýi kerek dep sheshtim. Memlekettik qoldaýdyń arqasynda armanym oryndaldy», – deıdi kásipker.
Búginde ortalyqta dısplazııadan arylýǵa, bulshyq et kerneýin jeńildetýge, jalpy densaýlyqty nyǵaıtýǵa, uıqyshyldyqtan, apatııadan arylýǵa arnalǵan massaj túrleri jasalady. Al kópbalaly ana Raýshan Jartybaeva tigin tsehyn ashyp, eki adamdy jumyspen qamtyp otyr.
«2021-2025 jyldarǵa arnalǵan kásipkerlikti damytý jónindegi ulttyq jobaǵa» sáıkes, jańa bıznes ıdeıalardy iske asyrýǵa arnalǵan memleketten beriletin qaıtarymsyz grantty jeńip aldym. Grant qarjysyna kerekti qural-jabdyqtardy satyp alyp, perdeniń túr-túrin zamanaýı úlgide tigip, kásip bastap otyrmyn», - deıdi ol.
Grant alyp, kásip bastaǵan kentaýlyqtyń biri – Bekzat Djýmabaev. Búginde ol turmystyq jıhazdardy jasaıdy. Taza eńbektiń arqasynda aı̆yna 700 000 teńgeden astam qarajat taýyp otyr.
«Tájirıbeniń arqasynda turǵyndardyń talǵamy men suranysyna saı sapaly keńse jáne turmystyq jıhazdar jasaýdamyn. Shaǵyn tsehta 2 adam jumys isteıdi. Baǵalarymyz da qymbat emes, halyqqa qoljetimdi. Kentaý men Túrkistan qalalarynyń turǵyndarynan tapsyrys qabyldap jatyrmyz», - deıdi kásipker.
Jalpy Kentaý qalasynda bıylǵy jyldyń 9 aıynda 2217 adam jumyspen qamtylǵan. Onyń 911-i turaqty jumysqa ornalassa, 1306 azamat sýbsıdııalanatyn jumys oryndaryna joldandy. Sondaı-aq, qala turǵyndarynyń 148-i áleýmettik jumys oryndarynda, 304 azamat jastar praktıkasynda, 659 adam qoǵamdyq jumystarda ter tógip júr. Sonymen qatar «Alǵashqy jumys orny» jobasy aıasynda 90 adam, «Kúmis jas» jobasy aıasynda 105 adam jumyspen qamtyldy. Jeke bastamalar aıasynda «10 myń turǵynǵa 100 turaqty jumys orny» boıynsha 755 jańa jumys oryny ashyldy.