Kentaýda jelmen ushqan mektep shatyrynyń bóligi muǵalimniń basyna tústi

TÚRKІSTAN. QazAqparat - Kentaýda jelmen ushqan mektep shatyrynyń bóligi muǵalimniń basyna tústi, ol aýrýhanada jatyr, dep habarlaıdy QazAqparat tilshisi.

Qatty jelden Kentaý qalasyndaǵy mektep pen kolledjdiń jáne turǵyn úılerdiń shatyry ushyp, halyqty ábigerge salýda.

Keshegi kúni qala ortalyǵynda ornalasqan Y. Altynsarın atyndaǵy №1 mekteptiń de shatyry qulap, aýlada ketip bara jatqan ustazdyń basyna túsken bolatyn. Birden aýrýhanaǵa jetkizilgen pedagogke alǵashqy dárigerlik kómek kórsetildi. «Qazir naýqastyń jaǵdaıy ortasha. Basyndaǵy samaı bóligindegi jaraqat tigildi. Travmatologııa bóliminde em alyp jatyr», - dedi Kentaý qalalyq ortalyq aýrýhanasynyń bas dárigeri Asylbek Ýtebaev.

Eske salaıyq, Túrkistan oblysynda birneshe kúnnen beri qatty jel soǵyp, úıler men ózge de nysandardyń shatyry búlindi, myńdaǵan abonent jaryqsyz qalyp, sabaqtar onlaın formatqa aýystyryldy.

Kentaý qalasynda mektep pen kolledj shatyry ushyp ketti, barlyq bastaýysh synyp oqýshylary qashyqtan bilim alýǵa kóshirildi.