Kentaýda oblystyq gazettiń júldesi úshin qazaq kúresinen jarys uıymdastyryldy

KENTAÝ. QazAqparat – Túrkistan oblysynyń Kentaý qalasynda qazaq kúresinen dástúrli jarys uıymdastyryldy. «Ońtústik Qazaqstan» gazetiniń júldesi úshin ótken týrnırge quramynda 85 sportshy bar 11 komanda qatysty, dep habarlaıdy QazAqparat tilshisi.

Jarystyń ashylý saltanatynda alǵash bolyp sóz alǵan oblystyq Dene shynyqtyrý jáne sport basqarmasy basshysynyń orynbasary Danııar Isabaev týrnırge qatysýshylarǵa sáttilik tiledi.

Al, Kentaý qalasy ákiminiń orynbasary Samat Rasul men oblystyq Qoǵamdyq damý basqarmasy basshysynyń mindetin atqarýshy Damır Júnisov týrnırdiń ulttyq sport salasyndaǵy róline erekshe toqtaldy. Sonymen qatar ardager jýrnalıst Baıdýlla Qonysbek pen QR eńbek sińirgen jattyqtyrýshy Jarylqasyn Ońalbek týrnırdiń tarıhyna toqtalyp ótti.

Balýandar boz kilemde 6 salmaq dárejesi boıynsha synǵa tústi. 82 keliden joǵary salmaqtaǵylar «Túıe balýan» ataǵyna talasty. Tartysty ótken beldesýlerdiń qorytyndysy boıynsha Shardara aýdanynan kelgen Qaısar Shamshıdınov «Túıe balýan» atandy. Oǵan «Neksııa» avtokóliginiń kilti tabystaldy.