Kentaýda qatty jeldiń saldarynan ǵımarat shatyrlary ushyp jatyr

<p>Kentaýda jeldiń uıytqýy sekýndtyna 25-30 metrge jetti, dep habarlaıdy <a href="Kazinform" target="_blank" rel="noopener">Kazinform</a>.</p>

Eki kúnnen beri Kentaýda qatty jel soǵyp tur. Saldarynan elektr energııasy sónip, kommýnaldyq salada birqatar problemalar oryn aldy.

Atap aıtar bolsaq, keshe keshkisin qatty daýyldan jaryq sónip, kóp qabatty turǵyn úılerde jylý temperatýrasy tómendep ketti.

Sondaı-aq, ǵımarattardyń shatyrlary ushyp, elektr jelileri úzilgen. Jeke sektordaǵy úılerdiń qaqpalary men qorshaý qabyrǵalary qulaǵan.

«Jeldiń qatty soǵýy saldarynan ǵımarattardyń shatyrlary jáne taǵy da basqa zattardyń ushýy, taldardyń qulaýy oryn alýda. Qaýipsizdik erejelerin saqtap, kóshege qajettiliksiz shyqpaýlaryńyzdy suraımyz!» - delingen Kentaý qalasy ákimdigi taratqan aqparatta.

Al,«Qazgıdromet» mamandary óńirdegi jel erteńge deıin toqtamaıtyndyǵyn habarlady.

«Tańerteń aýa temperatýrasy jylyna bastaıdy. 16,17 jeltoqsanda Túrkistan óńirinde jańbyr jaýady dep kútilip otyr», - delingen aqparatta.

Qazir qalanyń keıbir aýmaqtarynda jaryq áli janbady. Al, jergilikti ákimdik kommýnaldyq saladaǵy týyndaǵan máselelerdi qalpyna keltirý boıynsha táýlik boıy jumys istep jatqanyn málimdedi.

Aıta keteıik, keshe túnde Kentaýdaǵy jylý energo ortalyq 10 mınýtqa óship qalǵanyn jazǵan bolatynbyz.