Kentaýda «Qarashyq» tarıhı-etnografııalyq mýzeıi ashyldy
Tarıhı jádigerler saqtalǵan nysannyń ashylý saltanatyna QR Parlament Májilisiniń depýtaty Fahrıddın Qarataev pen mýzeı ǵımaratyn salǵan demeýshi Habıbbýlla Azımov, Kentaý qalalyq «Aqsaqaldar alqasynyń» tóraǵasy Murat Abdýllaevtar pen qala turǵyndary qatysty.
Jańa mýzeı Túrkistandaǵy «Áziret Sultan» memlekettik tarıhı-mádenı qoryq-mýzeıi men Qarashyq aýyldyq okrýgi ákimdiginiń bpastamasymen ashyldy. Saltanatty sharada Qazaqstannyń ár óńirinen kelgen tarıh, arheologııa, etnografııa, fılosofııa, fılologııa, shyǵystaný, mádenıettaný salalarynyń ǵalymdary men tarıhı-mádenı muralardy qorǵaý mamandary, «Áziret Sultan» memlekettik tarıhı-mádenı qoryq-mýzeıiniń, ǵylymı-zertteý ınstıtýttary jáne ortalyqtarynyń qyzmetkerleri quttyqtaý sóz sóıledi.
«1999-2003 jyldar aralyǵynda Qarashyq aýyldyq okrýginiń aýyldaryn kezeń-kezeńimen zertteý barysynda kóptegen tarıhı derekter anyqtaldy. Qazba kezinde tabylǵan pishini erekshe keramıkalyq zattardyń qoldanylý kezeńi tereń zertteýdi qajet etti. Odan ózge de jádigerler tarıhı dálelderdi naqtylap berdi. Halyq túrli jaǵdaılarǵa baılanysty Qarashyq-1 jerinen Qarashyq-2-ge, odan keıingi kezeńderde Qarashyq-3 aýylyna qaraı qonys aýdaryp otyrǵany da belgili boldy. B.e.d. VI-V ǵasyrdan b.z. II-III ǵasyrlardy qamtıtyn jádigerler Qarashyq tarıhy bertinde qalyptasqan degen pikirlerdi joqqa shyǵardy. Mýzeıge qoıylǵan eksponattar da erteden búginge deıingi aralyqty qamtıdy. Sonymen qatar, eginshilik pen aǵash, temir ustalyǵymen aınalysqan jergilikti halyqtyń atadan - balaǵa mıras kásibin aıqyndaıtyn zattary da mýzeıden oryn aldy»,- deıdi tarıh ǵylymdarynyń kandıdaty, arheolog Marat Tuıaqbaev.
Aıta keteıik, tarıhı-etnografııalyq mýzeıge kóne Qarashyq qalasynda júrgizilgen arheologııalyq qazba jumystary kezinde tabylǵan jádigerler men tarıhı dúnıeler qoıylǵan. Ejelgi dáýirden qazirgi zamanǵa deıingi kezeńderdi qamtıtyn eskponattar sany 2000-ǵa jýyqtaıdy. Qarashyq aýylynyń 2000 jyldyq tarıhyn tereńdeı zerttep, anyqtaǵan ǵalymdardyń biri - Marat Tuıaqbaev.