Kentaýda «Hızb-ýt-Tahrır» ekstremıstik uıymynyń músheleri quryqtaldy

<p>ASTANA. KAZINFORM — Túrkistan oblysynda elde zaıyrly konstıtýtsııalyq qurylymdy qulatyp, «sharıǵat» normalaryn engizýdi maqsat etken ekstremıstik uıymnyń toby joıyldy. Bul týraly Polisia.kz resmı saıty habarlady.</p>

ІІM ekstremızmge qarsy is-qımyl jónindegi bólinisi Ulttyq qaýipsizdik komıtetiniń kómegimen Kentaý qalasynda «Hızb-ýt-Tahrır» dinı-ekstremıstik uıymynyń jasyrylǵan tobyn joıdy.

Bul uıymnyń ıdeologııasy elde zaıyrly konstıtýtsııalyq qurylymdy qulatyp, «sharıǵat» normalaryn engizýge baǵyttalǵan. Jedel-izdestirý is-sharalary barysynda top músheleriniń terrorızm ıdeıalaryn nasıhattaý, sondaı-aq dinı kózqarasty qorlaý faktileri anyqtaldy.

Top músheleri «Hızb-ýt-Tahrır» sheteldik radıkaldy ýaǵyzshylarynyń dáristerin alý jáne taratý úshin ınternet-resýrstardy paıdalanǵan. Top jetekshisi buǵan deıin tyıym salynǵan dinı-ekstremıstik uıymnyń qyzmetine qatysqany úshin sotty bolǵan.

«Júrgizilgen sharalar nátıjesinde 10 kúdikti ustaldy. Olardyń turǵylyqty jerlerin tintý kezinde dinı-ekstremıstik ádebıetter men basqa da zattaı dáleldemeler tárkilendi. Qazirgi ýaqytta terrorızmdi nasıhattaý jáne dinı alaýyzdyqty qozdyrý belgileri boıynsha sotqa deıingi tergeý júrgizilip jatyr», — delingen habarlamada.

Buǵan deıin Túrkistan oblysynda ekstremıstik sıpattaǵy materıaldardy taratqan kúdikti ustalǵany habarlandy.