Kentaýda fast-fýdtan ýlanǵandar sany kóbeıýi múmkin – dáriger

TÚRKІSTAN. QazAqparat Kentaýda fast-fýdtan ýlanǵandar sany kóbeıýi múmkin. Bul týraly Kentaý qalalyq ortalyq aýrýhanasynyń bas dárigeri Asylbek Ýtebaev málimdedi, dep habarlaıdy QazAqparat tilshisi.

Dárigerdiń aıtýynsha, qazir aýrýhanaǵa kelmeı, úılerinde emdelip jatqan naýqastar bar. Solarda aldaǵy ýaqytta dárigerlerdiń kómegine júginýi múmkin. Sol sebepti qalalyq aýrýhananyń juqpaly aýrýlar bólimshesinen qosymsha taǵy 40 oryn daıyndaldy.

«Naýqastar chıken, pıtstsa, sýshı jegenin aıtýda. Barlyǵy 25-26 maýsym kúnderi Kentaý qalasyndaǵy dámhanadan fast-fýd ónimderin jegen. Іshinde tapsyryspen úılerine aldyrtqandar da bar. Olar dene qyzýy joǵarylaǵanyn, qusyp, ishiniń ótkenin aıtyp shaǵymdanǵan. Qazirgi tańda Kentaý qalalyq aýrýhanasynyń juqpaly aýrýlar bólimshesine 67 naýqas jatqyzyldy. Onyń ishinde 40 bala, 3 júkti áıel bar. Barlyǵynyń jaǵdaıy ortasha dárejedegi aýyrylyqta. 25 naýqas ambýlatorııalyq em qabyldap jatyr»- dedi Asylbek Ýtebaev.

Dárigerlerdiń aıtýynsha, erteńnen bastap jaǵdaılary jaqsarǵan turǵyndardy aýrýhanadan shyǵarý, ármen qaraı ambýlatorııalyq emge jiberý jumystary júrgizilmek.

Aıta keteıik, budan aldyn Kentaýda fast-fýdtan ýlanǵandar sany 92-ge jetkenin jazǵan bolatynbyz.