Kentaýda 900-ge jýyq otbasy baspanamen qamtylady

KENTAÝ. QazAqparat - Bıyl Kentaý qalasynda 300-ge jýyq otbasy, al 2020 jylǵa qaraı 900-deı januıa baspanamen qamtylady, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

Búgingi tańda qalada 5 qabatty árqaısysy 60 páterli 5 turǵyn úı aıaqtalýǵa jaqyn.

Atap aıtqanda, Kentaý qalasy Jibek joly kóshesindegi №41 turǵyn úıdiń, Altynsarın kóshesindegi №9B jáne Sh.Ýálıhanov kóshesindegi №136A turǵyn úıiniń qurylys jumystary tolyǵymen aıaqtalyp, búgingi tańda aýlany abattandyrý jumystary júrgizilýde. Sondaı-aq, Seıfýllın kóshesindegi №116 turǵyn úıidiń búgingi tańda ishki árleý, sylaq jumystary jumystary júrgizilýde. Al D.Qonaev kóshesindegi №44A turǵyn úıdiń qurylysy boıynsha búgingi tańda 4-qabattyń qabarǵasyn qalaý jumystary júrgizilýde. Atalǵan turǵyn úılerde 1 bólmeli - 15 páter, 2 bólmeli - 15 páter, 3 bólmeli - 30 páter bar.

Sonymen qatar, Sh.Ýálıhanov kóshesi boıynan 5 qabatty 60 páterli 10 turǵyn úıdiń qurylys jumystary bastalýda. Páter sany - 600, jalpy aýdany - 33 470 sharshy metr. Nysandar 2020 jyly aıaqtalýy kerek.

Aıta keterligi, Kentaý qalasynda 2018 jyly «Nurly jer» baǵdarlamasy aıasynda árqaısysy 60 páterli 2 turǵyn úı kesheniniń qurylys jumystary júrgizilip, 120 otbasy baspanamen qamtylǵan. Paıdalanýǵa berilgen turǵyn úılerdiń jalpy aýdany - 7 294 sharshy metr.