Kentaýda 8 besikti qatar terbetken ana turady
El egemendigin alǵan alǵashqy jyldary kentaýlyq Jumashevtar áýleti «ArNur» atty otbasylyq balalar úıin ashty. Basty maqsat – tastandy sábılerdi qamqorlyqqa alý bolatyn. Otaǵasy Ysqaq Turǵanbaıulynyń bastamasymen qolǵa alynǵan ıgilikti isti zaıyby Gúljahan da qoldady. Sol kezde otbasylyq úlgidegi balalar úıine 13 tastandy sábı qabyldandy. Olardyń 8-i besiktegi qundaqtaýly búldirshinder bolsa, qalǵandarynyń jasy áli birge tolmaǵan perishteler edi. Keıinnen 2 bala týǵan analarymen qaıta qaýyshty. Al 7 sábıdi bala ıisin ańsaǵan ózge otbasylar baýyryna basty. Qalǵan 4 qyz qazirgi kezde Jumashevtar áýletiniń músheleri.
«Táýelsizdik alǵan alǵashqy jyldar ǵoı. Óte qıyn kezeńderdi bastan keshirdik. Alǵashqyda «qalaı bolar eken» dep qoryqqanymyz ras. Degenmen, táýekel ettik. Birden segiz besikti qatar terbetken kezderim boldy. Balalardyń bireýi qarny ashyp jylasa, bireýiniń uıqysy keledi. Barshasyn jubatyp júrgende tań ata bastaıtyn. Sodan joldasym ekeýmiz kezekpen-kezek jubatyp júrip, uıyqtaıtynbyz», - deıdi Gúljahan Kerimbaıqyzy.
Búginde qyzdardyń barlyǵy joǵary oqý oryndaryn bitirip, ártúrli salalarda jemisti eńbek etip keledi. Sondaı-aq, barshasy turmys quryp, bir-bir úıdiń ıbaly kelini atanyp otyr.
«Qyzdarym nemerelerimdi alyp kelip turady. Barlyǵy tátti. Burynǵy sátterdi tek kúlip qana eske alamyz», - deıdi aq jaýlyqty áje.
Ysqaq Jumashev kóp jyldar boıy densaýlyq saqtaý salasynda eńbek etken. Zeınetke shyqqan soń, jeke kásippen aınalysty. Qalalyq aqsaqaldar alqasyn basqaryp, qoǵamdyq jumystarǵa belsene aralasqan. Gúljahan Kerimbaıqyzy da aq halatty abzal jan. Jubaıymen birge dúnıege ákelgen 3 ul, 2 qyzdy adamgershiligi mol, ımanjúzdi jandar etip tárbıeledi. Búgingi kúni árqaısysy eldiń damýyna qyzmet etip keledi.
Atap aıtar bolsaq, dárigerler otbasynyń tuńǵysh uldary Arman - T.Júrgenov atyndaǵy Qazaq ulttyq óner akademııasynda ustaz, ǵalym, professor. Al, ekinshi uly Nurjan Kentaý qalasyndaǵy sýret mektebiniń dırektory bolsa, qyzy Sholpan - Atatúrik atyndaǵy №4 mektep-lıtseıdiń muǵalimi. Erjan ákesi men anasynyń jolyn qýyp, dáriger bolǵan. Qazir Kentaýdaǵy ortalyq aýrýhananyń jansaqtaý bóliminiń meńgerýshisi laýazymyn atqarady. Al, Baljan esimdi kenjeleri Astanada ÝZI dárigeri bolyp eńbek etýde.
«Joldasym árdaıym jaqsylyq jasaýǵa asyǵyp turatyn adam edi. Amal neshik, 80 jastan asqan shaǵynda ómirden ótti. Kózi tiri kezinde «Altyn júrek» nomınatsııasynyń jáne Respýblıkalyq «Mereıli otbasy», «Altyn shańyraq» baıqaýlarynyń júldegeri atandyq. Bul biz úshin úlken qýanysh. Qazir barlyq iske balalarym qamqorlyq tanytady», - deıdi Gúljahan Kerimbaıqyzy.
Jýyrda Túrkistan oblystyq ardagerler keńesi janynan qurylǵan «Ájeler alqasyna» 10 jyl tolýyna oraı óńirde «Aıaly áje» forýmy ótti. Onda ulttyq taǵamdar men dástúrge, qolónerge arnalǵan kórme uıymdastyryldy. Sondaı-aq, el ishinde eren eńbegimen tanylǵan, dástúrimizdi dáriptep júrgen ájeler «Oblysqa sińirgen eńbegi úshin» tósbelgisimen, oblys ákiminiń, oblystyq máslıhattyń jáne oblystyq ardagerler keńesiniń gramotasymen marapattaldy. Eńbegimen elge tanylǵan ájelerge ártúrli nomınatsııalar berildi. Solardyń ishinde, 8 besikti qatar terbetken, «Altyn júrek» nomınatsııasynyń ıegeri Jumash Gúljahan Kerimbaıqyzy Gran-prı ıegeri atanyp, «Oblysqa sińirgen eńbegi úshin» tósbelgisimen marapattaldy.
«Meniń bar baqytym balalarym, qyzdarym. Solar aman bolsa – men baqyttymyn. Atalary jaqsy tálim-tárbıe berip, baǵyt baǵdarlaryn aıqyndap berdi. Qazir sol jolmen júrip keledi. Nemerelerimdi betinen súıip, shóberelerimniń alaqanynan maı jalap otyrǵan men baqyttymyn» - deıdi Gúljahan Kerimbaıqyzy.