Kentaý turǵyny Kongo-Qyrym bezgegine shaldyǵý kúdigimen aýrýhanaǵa jatqyzyldy

TÚRKІSTAN. QazAqparat – Kentaýlyq turǵyn Kongo-Qyrym qandy bezgegine shaldyqty degen kúdikpen aýrýhanaǵa jatqyzyldy. Bul týraly qalalyq Sanıtarııalyq-epıdemıologııalyq baqylaý basqarmasynyń basshysy Ǵazıza Egemberdıeva málim etti, dep habarlaıdy QazAqparat tilshisi.

Qala turǵyny kene shaqqannan úsh kún ótken soń dárigerge qaralǵan.

«Bizdiń qoldanystaǵy buıryqtarǵa sáıkes kene shaqqan adamnyń dene qyzýy kóterilse, dereý statsıonarǵa jatqyzamyz. Basty maqsat – aýrýdyń bar-joǵyn tekserip, asqynýlardyń aldyn alý. Sondaı algorıtm bar. Qazirgi kezde naýqas aýrý juqtyrdy degen kúdikpen baqylaýǵa alyndy. Densaýlyǵy birqalypty» - dedi basqarma basshysy.

Sondaı-aq Ǵazıza Egemberdıeva jelilerde atalǵan jaǵdaıǵa qatysty jalǵan aqparattar tarap jatqanyn jetkizdi.

«Jelide tarap jatqan aqparattar shyndyqqa saı emes. Otbasyndaǵy jáne qarym-qatynasta bolǵan adamdardyń barlyǵy úıinde, eshqaısysy aýrýhanada jatqan joq. Naýqas úıinde bolǵan sátte eshqandaı qan ketý jaǵdaılary oryn almaǵan. Qoldanystaǵy buıyryqtarǵa sáıkes otbasyndaǵy músheleri 14 kúnge medıtsınalyq baqylaýǵa alynady. Tańerteń jáne keshkilik dene qyzýlary tekseriledi. Bul ol adamdardyń barlyǵy aýrý degen sóz emes» - dedi ol.

Aıta keteıik, áleýmettik jelide Túrkistanda kene shaqqan eki adam qaıtys bolǵany, al Kentaýda kene shaqqan bir adamnan qan ketip jatqany týraly aqparat tarady. Sondaı-aq dybystyq habarlama jazǵan adam «qarym-qatynasta bolǵan adamdardyń barlyǵy aýrýhanaǵa tústi» degen málimet aıtady.