Kentaý transformator zaýytynyń jumysshylary elordanyń atyn aýystyrý týraly sheshimdi qoldaıdy

TÚRKІSTAN. QazAqparat - Túrkistan oblysy Kentaý qalasyndaǵy transformator zaýytynyń jumysshylary elordanyń atyn aýystyrý týraly sheshimdi biraýyzdan qoldaıtyndyqtaryn jetkizdi. Zaýyt ujymy Saryarqa tórinde ózi bastamashy bolyp, irgetasyn qalaǵan Astana qalasynyń atyn Nur-Sultan dep ataý durys sheshim ekenin aıtady, dep habarlaıdy QazAqparat tilshisi.

Kentaýlyq jumysshylardyń pikirinshe, Ult Kóshbasshysy Nursultan Nazarbaev prezıdenttik ókilettiligin toqtatý jóninde tarıhı sheshim qabyldady. Táýelsizdigimizdiń irgetasyn qalap, qaryshtap damý jolyna túsken qýatty elge aınaldyrǵan Elbasymyzdyń bul qadamy da danalyq sheshim dep sanaıdy.

«Nursultan Ábishuly osy sheshimi arqyly demokratııalyq qundylyqtardy joǵary qoıatynyn kórsetti. Ult Kóshbasshysy jastarǵa senim artatynyn aıtty. «Jas qazaqstandyqtarǵa aıtarym: táýelsiz Qazaqstanymyzdy, ortaq Otanymyzdy, Máńgilik elimizdi saqtaı bilińizder. Bul - bizdiń halqymyz, bizdiń uly babalarymyzdyń jeri. Otanymyz da, jerimiz de bir», - deıdi transformator zaýytynyń jumysshylary.

Aıta keteıik, búginde «Kentaý transformator zaýyty» AQ-nyń ujymynda 1300 adam jumys isteıdi. Olardyń arasynda otanshyl ári jalyndy jas mamandar bar. Elbasy júrgizgen saıasattyń arqasynda bul kásiporynǵa memleket tarapynan túrli qoldaýlar kórsetildi. Nátıjesinde zaýyt óndirgen ónimdi tek Qazaqstan emes, shetel naryǵyna da shyǵarýǵa múmkindik týdy. Sondyqtan atalǵan ujym Nursultan Ábishulyna sheksiz alǵysyn aıtady.

«Óz Joldaýlarynda, «Nur Otan» partııasynyń sezderinde kásipkerlikke, otandyq kásiporyndarǵa qoldaýyn aıamaǵan Ult Kóshbasshysy aldaǵy ýaqytta da Qazaqstannyń órkendeýine úles qosa beredi dep senemiz»,-deıdi «Kentaý transformator zaýyty» AQ-nyń ujymy.