Kentaý qalasy tótenshe ekologııalyq jaǵdaı aımaǵy dep jarııalanýy múmkin
«Kentaý qalasynyń jáne oǵan irgeles jatqan eldi mekenderdiń aýmaǵyn tótenshe ekologııalyq jaǵdaı nemese ekologııalyq zilzala aımaǵy dep anyqtaý maqsatynda Túrkistan oblysynyń ákimdigi «Kentaý qalasynyń jáne oǵan irgeles eldi mekenderdiń halqynyń densaýlyǵyna jáne qorshaǵan ortanyń jaı-kúıine keshendi baǵalaý júrgizý» ǵylymı-zertteý jumysyn (budan ári – ǴZJ) júrgizdi. Qazaqstan Respýblıkasy Ekologııa kodeksi 405-babynyń 6-tarmaǵyna sáıkes densaýlyq saqtaý, bilim jáne ǵylym salasyndaǵy ýákiletti organdardyń qorytyndysymen birge aýmaqty zerttep qaraý materıaldary memlekettik ekologııalyq saraptama júrgizý úshin qorshaǵan ortany qorǵaý salasyndaǵy ýákiletti organǵa beriledi», - delingen Úkimet basshysynyń jaýabynda.
Onyń atap ótýinshe, zańnamaǵa sáıkes ǴZJ nátıjeleri qorytyndylardy alý úshin Qazaqstan Respýblıkasynyń Ǵylym jáne joǵary bilim, Densaýlyq saqtaý mınıstrlikterine joldanǵan. Qazaqstan Respýblıkasy Ǵylym jáne joǵary bilim mınıstrligi tarapynan oń qorytyndy berilgen. Qazaqstan Respýblıkasy Densaýlyq saqtaý mınıstrligi qorytyndyny eskertýlermen joldaǵan. Merdiger eskertýlerdi joıyp, materıaldardy DSM-ǵa qaıta joldaǵan, qazirgi ýaqytta qaralyp jatyr. Densaýlyq saqtaý, bilim jáne ǵylym salalaryndaǵy ýákiletti organdardyń qorytyndylary usynylǵannan keıin Qazaqstan Respýblıkasy Ekologııa, geologııa jáne tabıǵı resýrstar mınıstrligi (budan ári – EGTRM) memlekettik ekologııalyq saraptamany júrgizedi. 2023 jylǵy qańtardyń birinshi onkúndiginde EGTRM, DSM jáne Túrkistan oblysy ákimdigi ókilderiniń qatysýymen osy máseleni sheshýdi jedeldetý boıynsha keńes ótkizý josparlanyp otyr.
«Sondaı-aq, qazirgi ýaqytta memlekettik basqarý deńgeıi arasynda ókilettilikterdi ortalyqsyzdandyrý boıynsha sharalar qabyldaý maqsatynda múddeli memlekettik organdarmen birlese otyryp, tıisti jumys júrgizilip jatqanyn atap ótý qajet, onda Kodekstiń 405-babynyń 8-tarmaǵyna jáne 410-bapqa qorshaǵan ortany qorǵaý salasyndaǵy ýákiletti organnyń sheshimimen aýmaqty tótenshe ekologııalyq jaǵdaı aımaǵy dep jarııalaý jáne tótenshe ekologııalyq jaǵdaı aımaǵy quqyqtyq rejıminiń qoldanysyn toqtatý bóliginde ózgerister engizý usynylýda», - dedi Premer-Mınıstr.