Kentaý qalasy tabıǵı gazben tolyq qamtylady

ShYMKENT. QazAqparat - Ońtústik Qazaqstan oblysyndaǵy Kentaý qalasy bıyl tolyqtaı tabıǵı gazben qamtylatyn bolady, dep habarlaıdy QazAqparat tilshisi.

Bul maqsatta qazynadan 3 mlrd 842 mln teńge jumsalyp, ótken jyly qubyrlar tartý jumystary aıaqtaldy.

Sala mamandarynyń sózinshe,  qurylys montaj jumystary men elektr júıeleri de júrgizildi. 1 transformator, 5 jaıtartqysh, 1 projektorly dińgek  ornatyldy. Búgingi tańda Kenshiler qalasy men Hantaǵy aýylyn tabıǵı gazben qamtamasyz etý maqsatynda 67,8 mln teńgege jobalaý-smetalyq qujattamalar ázirlenip, tıisti oryndarǵa tapsyrylǵan.  Qurylys jumystary aǵymdaǵy jyly 3 kezeń boıynsha iske asyrylyp, qalaǵa gaz berý isi júzege asatyn bolady.

Budan bólek,  qalaǵa qarasty Qarnaq, Qushata jáne Baıyldyr aýyldaryn tabıǵı gazben qamtamasyz etýge jobalaý-smetalyq qujattamalar ázirleýge 33,8 mln teńge qarjy qaralyp, jumys jobalary aǵymdaǵy jyly aıaqtalady dep kútilýde.
 

Aıta keteıik, búginde eldimekenderdi gazdandyrý jumystaryna oblys ákimi erekshe nazar aýdaryp keledi. Janseıit Túımebaevtyń bastamasymen 2017-2020 jyldarǵa arnalǵan jumys jospary bekitilip, ótken jyly óńirde  300 eldi meken gazdandyryldy. Josparǵa sáıkes 3 jyldyń ishinde qosymsha 383 mekenge «kógildir otyn» jetkizilmek. Bul maqsatqa bıýdjetten 13 mıllıard 400 mıllıon teńge qarjy bólinip, jyl boıyna 89 nysanda qurylys jumystary júrgizilgen.

Al aǵymdaǵy jyly oblysta tabıǵı gazben qamtamasyz etý salasynda  67 nysannyń qurylysy júrgizilip, 42 eldi mekenge kógildir otyn  jetkiziledi dep kútilýde.