Ákim Kentaýda jelden zardap shekken nysandardy shuǵyl qalpyna keltirýdi tapsyrdy

<p>Kentaý qalasyndaǵy jylý berý ortalyǵynda Túrkistan oblysynyń ákimi Darhan Satybaldynyń tóraǵalyǵymen aýa raıynyń qolaısyzdyǵyna baılanysty bolǵan jaǵdaıdyń saldaryn joıýǵa qatysty keńes ótti. Oǵan jaýapty sala basshylary jáne quqyq qorǵaý organdary ókilderi qatysty, dep habarlaıdy <a href="https://kaz.inform.kz/" target="_blank" rel="noopener">Kazinform</a> oblys ákimdiginiń baspasóz qyzmetine silteme jasap.&nbsp;</p>

Shtab otyrysynda oblys basshysyna osy jaǵdaı boıynsha jumystar týraly baıandaldy. Bolǵan jaıtqa qatysty tyńǵylyqty tekserý júrgizip, naqty sebebin anyqtaýdy júktegen ákim aldaǵy ýaqytta strategııalyq mańyzdy nysanda jaryqtyń sónýine jol berilmeýin qatań eskertti.

Daýyldy jelden zaqymdalǵan elektr jelilerin qalpyna keltirý barysy týraly «Ońtústik Jaryq Tranzıt» JShS-niń bas dırektory Murat Ibragımov, qatty jeldiń saldarynan oblys kóleminde zardap shekken nysandar jaıly Tótenshe jaǵdaılar departamentiniń basshysy Asqar Tóleshev, oblystaǵy operatıvtik jaǵdaı týraly oblystyq polıtsııa departamentiniń basshylyǵy baıandady.

Oblys ákimi jaýapty sala basshylaryna naqty tapsyrma júktep, oryndalý merzimin aıqyndap berdi. Oblys ákiminiń birinshi orynbasary Zulpyhar Joldasovqa jumys barysyn tikeleı baqylaýǵa alýdy mindettedi. 

Foto: Túrkistan oblysy ákimdigi

Daýyldy jelden elektr energııasy birneshe ret ​sónip, ortalyq qazandyqtardyń jumysy birer ýaqytqa toqtaǵan bolatyn. Qazirgi tańda 4 qazandyq shtattyq rejımde jumys atqaryp tur. Bolǵan jaıtqa baılanysty tekserý júrgizýdi tapsyrǵan oblys ákimi jylý ortalyǵynda táýlik boıy kezekshilik uıymdastyrýdy júktedi. Qalanyń keıbir aýmaqtarynda qatty jeldiń saldarynan sóngen abonentterdiń elektr energııasyn qosý jumystary júrgizilip jatyr.

«Aýa raıynyń qolaısyzdyǵynan bolǵan jaǵdaılardyń saldaryn joıý úshin shuǵyl túrde tıisti sharalardy júzege asyryp, birinshi kezekte oblys turǵyndarynyń qaýipsizdigin, sonymen qatar turǵyndardy sapaly ınfraqurylymdyq qyzmettermen qamtamasyz etý qajet. Jeldiń saldarynan zardap shekken nysandardy anyqtap, olardy qalpyna keltirý boıynsha sharalardy shuǵyl túrde uıymdastyrý kerek. Eń bastysy – turǵyndarǵa qolaıly jaǵdaı jasaý. Jumysqa asa jaýapkershilikpen qaraýdy tapsyramyn», – dedi Darhan Amangeldiuly.

Túrkistan oblysynyń ákimi Darhan Satybaldy jaýapty tulǵalarmen birge strategııalyq nysandy aralap, jumysshylarmen júzdesti.

Ortalyq jylý júıesi arqyly 14 myń abonent ortalyqtandyrylǵan jylýǵa qosylǵan. Onyń 100-den astamy bıýdjettik mekemeler bolsa, 336 kópqabatty turǵyn úı, 2 myńnan astam jeke sektordaǵy úıler. Sondaı-aq 4 myńdaı kommertsııalyq nysan atalǵan ortalyqtan jylý alyp otyr. 

Foto: Túrkistan oblysy ákimdigi

Aıta keteıik, 1934 jyly salynǵan №5 JEO-nyń negizgi materıaldyq jabdyqtarynyń 85 paıyzy tozǵan. Búginde Kentaý qalasynda jańa jylý ortalyǵyn salý máselesi qarastyrylyp jatyr. JEO elektr energııasyn óndiredi jáne Kentaý qalasynyń turǵyndaryn jylýmen qamtamasyz etetin jalǵyz strategııalyq nysan bolyp tabylady.

Sońǵy 10 jylda alǵash ret 6 qazandyqta kúrdeli jóndeý jumystary júrgizildi.