Kenishtegi apat: oıyqqa túsip ketken avtobýs orny shamamen tabyldy

<p>&laquo;Maıqaıyńaltyn&raquo; AQ aýmaǵynda jer astyna túsip ketken avtobýstyń jatqan jeri shamamen anyqtaldy. Mamandar geologııalyq radarmen skanerleý barysynda tehnıkanyń 5 metr tereńdikte jatýy múmkin ekenin aıtady, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Mamandar arnaıy skanermen oıyq túbine túsip, zertteý jumystaryn júrgizdi. Geologııalyq skanerdiń derekteri oıyq túbindegi topyraqta 5 metr tereńdikte metall tárizdes zattyń jatqanyn anyqtady. Avtobýs sol jerde bolýy múmkin. Oıyq shetindegi topyraqtar áli sýsyldap, tómen syrǵyp jatyr», — dep habarlady óńirlik tótenshe jaǵdaılar departamentiniń baspasóz qyzmeti.

Aıta keteıik, búgin ǵana Maıqaıyńda oıyqqa túsip ketken avtobýsty Balqash qalasynan ákelingen geologııalyq skanermen izdeýge kiriskenin habarlaǵan edik. 

Eske sala keteıik, 4 qańtar kúni «Maıqaıyńaltyn» ken ornynda úlken oıyq mańyndaǵy topyraq opyrylyp, 4 adam mingen avtobýs jerdiń astyna túsip ketken bolatyn.

Keıin oqıǵa ornynan eki adamnyń denesi tabyldy.

Keshkisin tabylǵandardyń kim ekeni belgili boldy.

Oqıǵa ornynda ıisshil ıtter jumys istep jatyr. Opyrylǵan jerde áli de topyraq syrǵyp túsip jatyr, opyrylý shekarasy turaqty emes.

Altyn kenishindegi qaıǵyly jaǵdaıǵa baılanysty polıtsııa sotqa deıingi tergeýdi bastady.