Keńsaı zıratyndaǵy órtten 60 molaǵa zalal keldi

NUR-SULTAN. QazAqparat – Almaty qalasyndaǵy «Keńsaı» shaǵyn aýdanynda bolǵan órtten molalarǵa zııan keldi. Bul týraly Almaty qalasy tótenshe jaǵdaılar departamenti basshysynyń orynbasary Samat Asaınov málim etti, dep habarlaıdy QazAqparat tilshisi.

«Qazgıdromet» mekemesiniń daýyldy eskertýine sáıkes Almaty qalasynyń mańynda tótenshe órt qaýpi jaǵdaıy saqtalady. Osyǵan baılanysty qalanyń órt sóndirý qyzmeti kúsheıtilgen rejımde jumys istep jatyr. Kún saıyn patrýldeý sharasy uıymdastyrylady. Barlyǵy 19 órt sóndirý bólimshesi jáne departamenttiń jeke quramynyń 100-den astam mamany daıyn», - dedi Samat Asaınov ortalyq kommýnıkatsııalar qyzmeti alańynda ótken baspasóz máslıhatynda.

TJD basshysy orynbasarynyń málimdeýinshe, osy kúnge deıin jergilikti atqarýshy organ ókilderimen birlesken 190 reıd uıymdastyryldy.

«Reıd barysynda órt qaýipsizdigin saqtamaǵan 117 adam ákimshilik jazaǵa tartyldy. Qazir bizdiń óńirde órt qaýpi jaǵdaıy saqtalyp tur. Ózderińiz biletindeı, keshe taý bókterinde 2 órt shyqty, ıaǵnı «Keńsaı» shaǵyn aýdanynda 1 gektar qurǵaq shóp jandy. Tilsiz jaýdy aýyzdyqtaýǵa jel jáne aımaqtyń taýly bolýy kedergi keltirdi. Órttiń saldarynan «Keńsaı» zıratynda 60 mola zardap shekti. Odan bólek, Kóktóbe mańynan da órt shyqty. Mamandar tilsiz jaýdy 1 saǵattyń shamasynda aýyzdyqtady», - deıdi ol.

Sondaı-aq, spıker órt saldarynan adam zardaby men shyǵynynyń bolmaǵanyn aıtty.

Eske sala ketsek, buǵan deıin Almatydaǵy taý bókterinde qýraǵan shóp órtengeni týraly habarlaǵan edik. Odan bólek, Kóktóbede de órt shyqqan bolatyn.

Vıdeodan alynǵan kadr