«Keńqııaq-Atyraý» reversi ІІІ toqsanda qoldanysqa beriledi

NUR-SULTAN. QazAqparat – Elimizdiń batysynan shyǵysyna tasymaldanatyn munaı kólemin 6 ese arttyratyn joba bıyl úshinshi toqsanda aıaqtalady, dep habardaıdy QazAqparat tilshisi.

Energetıka mınıstrliginiń baspasóz qyzmeti redaktsııanyń saýalyna osyndaı jaýap joldady.

«Búgingi tańda elimizdiń úsh iri munaı óńdeý zaýyttaryna («AMÓZ» JShS, «PMHZ» JShS jáne «PKOP» JShS) munaı jetkizý tolyq qamtylǵan. Sonymen qatar, «MunaıTas» JShS ónimdiligi jylyna 6 mln tonna bolatyn «Keńqııaq-Atyraý» munaı qubyrynyń revers jobasy iske asyrylýda. Revers jobasyn iske asyrýdy aıaqtaý 2021 jylǵy 3 toqsanǵa josparlanǵan», - dep jazady vedomstvonyń mamandary.

Negizi bul joba byltyr jeltoqsanda bitýi kerek bolǵan. Pandemııaǵa baılanysty shekteýler nysannyń qoldanysqa berilý merzimin shegerip otyr.

Mınıstrliktiń jaýabyna súıensek jaqyn arada munaı eksportynyń tasymaly jolyn ártaraptandyryp, qazirgi marshrýttarǵa táýeldilikten qutqaratyn tyń baǵyttar qolǵa alynbaıtyn tárizdi.

«Qazaqstan Respýblıkasynyń qoldanystaǵy eksporttyq baǵyttary aıtarlyqtaı ártaraptandyrylǵan. Elimizde óndirilgen munaıdyń negizgi kólemi dástúrli túrde Eýropalyq Odaq, Ońtústik-Shyǵys Azııa jáne taǵy basqa baǵyttarǵa eksporttalady. Kaspıı qubyr konsortsıýmy men Atyraý-Samara munaı qubyrlary Qazaqstan Respýblıkasy úshin munaıdyń qoldanystaǵy negizgi eksporttyq baǵyttary bolyp tabylady», - dep jazady mınıstrliktegiler.

ıAǵnı eksport kólemin arttyrý úshin osy atalǵan qubyrlardyń tasymal qýatyn arttyrý kózdelip otyr.

«Teńiz jáne Qashaǵan ken oryndarynda munaı óndirisiniń ulǵaıýyna baılanysty 2019 jyly Kaspıı qubyr konsortsıýmy aktsıonerleri munaı qubyrynyń tar jerlerin joıý jobasyn iske asyrý týraly sheshim qabyldady. Joba bolashaqta qazaqstandyq ýchaskeniń ótkizý qabiletin jylyna 53,7 mln tonnadan 72,5 mln tonnaǵa deıin arttyrýǵa múmkindik beredi. Jobany iske asyrýdy aıaqtaý 2023 jylǵa josparlanǵan», - dep jazylǵan resmı jaýapta.