Kenesary hannyń Qurany tabyldy
«Jıynnyń sońynda eldiń rýhyn kóteretin taǵy bir jaqsy jańalyqty sizdermen bóliskim keledi. Áıgili Maral ıshannyń Kenesary hanǵa syılaǵan Qurany tabyldy. Bul – elimizdiń rýhanı ómirindegi eleýli oqıǵa. Maral ıshan barsha qazaqqa tanymal adam bolǵan. Ol – tól tarıhymyzda erekshe orny bar Kenesary hannyń úzeńgiles serigi. Bul Quran eki ǵasyr boıy qoldan qolǵa ótip, aqyry shetelge shyǵarylǵan eken. Ony janashyr azamattardyń, metsenattardyń kómegimen Qazaqstanǵa qaıtaryp aldyq. Quranda Maral ıshannyń jáne Kenesary hannyń móri bar. Jádigerge jan-jaqty saraptama jasaldy. Otandyq jáne sheteldik ǵalymdar Qurandy muqııat zerttedi. Qurannyń, rasynda, Maral ıshanǵa tıesili bolǵany jáne Kenesary hanǵa berilgeni anyqtaldy. Kez kelgen órkenıetti el óziniń tarıhı muralaryna zor qurmetpen qaraıdy. Ony qasterlep, murajaıǵa nemese basqa da arnaıy oryndarǵa qoıady. Biz de babalardan mıras bolǵan árbir jádigerdi qadirlep, saqtaı bilýimiz kerek», - dedi Prezıdent.
Memleket basshysy osy Quran jaqynda Qazaqstan musylmandarynyń dinı basqarmasyna tabys etiletindigin aıtty.
«Óıtkeni, bul – búkil elge ortaq qazyna. Qundy muranyń barsha halqymyz úshin qasterli orynda turǵany abzal. Sondyqtan, Qurandy qalpyna keltirip, Qoja Ahmet ıAsaýı kesenesine qoıǵan jón dep sanaımyn. Kezinde Taıqazannyń elge oralýyn jurt jaqsy yrymǵa balaǵan edi. Kóp uzamaı Qazaqstan Táýelsiz memleket boldy. Ult azattyǵy úshin kúresken Kenesarynyń qolynda bolǵan Quran kitabynyń elge kelýi de jaqsy yrym dep oılaımyn. Bul oqıǵa Qazaqstannyń jańa dáýiriniń berekeli bastaýy bolsyn dep tileıik», - dedi Qasym-Jomart Toqaev.