Kene tek shaǵyp qoımaı, oba, súzek, brýtsellez sııaqty qaýipti aýrýlardy juqtyrady - dáriger

ALMATY. QazAqparat - Kene tek shaǵýymen ǵana emes, ortalyq júıke júıesine aýyr zaqym keltiretin kene entsefalıtin tasymaldaýshy retinde de qaýipti. Bul týraly Almaty qalalyq №11 emhananyń hırýrg-travmatology Jorabek Sultanov aıtty, dep habarlaıdy QazAqparat tilshisi.

«Kene entsefalıtti ǵana emes, sonymen qatar, 30-ǵa deıin aýrý túrlerin, onyń ishinde oba, týlıaremııa, borrelıoz, brýtsellez, súzek aýrýlaryn juqtyrýy múmkin. Keneniń shaǵý ýaqyty uzaqqa sozylmasa da, kene entsefalıtiniń juǵý qaýpi joqqa shyǵarylmaıdy», - dedi Jorabek Sultanov.

Onyń aıtýynsha, kene kóktem, jaz mezgilderinde qaýipti, tamyz aıynda ınfektsııa qaýpi kúrt tómendeıdi, al qyrkúıek, qazan aılarynda joıylady.

«Kene tańerteń jáne keshke belsendi bolady, ol kóleńkeli ylǵaldy jerlerdi jaqsy kóredi. Kene tómennen joǵary qaraı jorǵalaıtynyn umytpańyz. Onyń aǵash nemese bıik butadan shabýyl jasaıdy degen qate túsinik. Ol óziniń «oljasyn» ormannyń tómengi deńgeıindegi ósimdikter arasynda kútedi, ádette bıiktigi 1 m-den aspaıdy. Bıik shóptiń ishinde kene kún sáýlesinen jaqsy qorǵanady jáne shabýyl shaǵý múmkindigi joǵary», - dedi dáriger.

Spıker kene shaqqanda ne isteý kerek ekenin de aıtty.

«Eger sizdi kene shaqqanyn baıqasańyz, alǵashqy 4 kúnde shuǵyl kómek alý úshin dereý jaqyn jerdegi travmpýnktke barýyńyz kerek. Sebebi, kene shaqqan soń ár kún saıyn ımmýnoglobýlınniń tıimdiligi tómendeıdi. Travmpýnktte kene alynyp, shaqqan jeri emdeledi, kene entsefalıtine qarsy ımmýnoglobýlın engiziledi», - dedi Almaty qalalyq №11 emhananyń hırýrg-travmatology Jorabek Sultanov.

Eske salaıyq, Almatyda 29 naýryz – 28 sáýir arasynda ormandy alqaptarda, qala saıabaqtary men gúl baqtarda kenege qarsy dezınsektsııalyq óńdeý jumystarynyń birinshi kezeńi ótip jatyr.