Keń jolaqty ınternetti KazSat arqyly taratýǵa bolady - Talǵat Musabaev

ASTANA. QazAqparat - QR Parlament Senatynyń depýtaty Talǵat Musabaev keń jolaqty ınternetti KazSat jer serikteri arqyly taratýdy usyndy, dep xabarlaıdy QazAqparat tilshisi.

«Búginde respýblıka boıynsha keń jolaqty ınternetti optıkalyq-talshyqty symdar arqyly tartyp jatyr. Biraq ondaı ınternettiń jyldamdyǵy da, sapasy da joǵary bolmaıdy. Bizde KazSat júıesi bar emes pe? KazSat-1 bar, KazSat-2 bar. Atalǵan jer serikteri arqyly shalǵaı jatqan kez kelgen aýylǵa, kez kelgen turaqqa, kez kelgen qystaqqa sapaly ınternetti jetkizýge bolady. Sonda artyq aqsha shyǵarýdyń da qajeti joq», - dedi T.Musabaev Senatta ótken jıynda.

Onyń aıtýynsha, KazSat jer serikteriniń sıgnaly óte sapaly. Internettiń baǵasyn da aıtarlyqtaı tómendetýge bolady.

«Jer serikteri jumys istep tur. Sony paıdalana bilýimiz kerek. Árıne, Qazaqtelekomnyń bedeli bar shyǵar. Degenmen, qolda bar nárseni qoldanǵan jón», - dep atap kórsetti T.Musabaev.

Jıynǵa QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov te qatysty. Ol osy saladaǵy máselelerdi zerdelep shyǵatynyn jetkizdi.

«Shynymdy aıtsam, men ózim jer serikteri arqyly ınternetti taratýǵa bolatynyn bilgen joqpyn. Árıne, ondaıda tıisti suraqtar týyndaıdy. Biz quziretti organdarmen birlesip, osy máseleni Úkimet deńgeıinde, Prezıdent Ákimshiligi deńgeıinde kótere alamyz», - deıdi O.Bektenov.