Ken oryndaryn tsıfrlandyrýda munaıshylar jumyssyz qalmaı ma

<p>Bul suraqqa QR Energetıka vıtse-mınıstri Baqytjan Іlııas jaýap berdi, dep habarlaıdy <a href="https://kaz.inform.kz/" target="_blank" rel="noopener">Kazinform </a>tilshisi.</p>

Buǵan deıin vıtse-mınıstr eldegi munaı ken oryndary, janar-janarǵamaı beketteri, munaı óńdeý zaýyttary tsıfrlanatynyn, qazaqstandyqtardyń eldegi munaı-gaz qorlary men óndirisin baqylaı alatynyn aıtqan edi.

«Jumyssyz qalmaıdy dep oılaımyn. Sebebi bizdiń tsıfrlandyrý boıynsha jobalarymyz memlekettik baqylaý jáne qadaǵalaý fýnktsııalaryn jaqsartý, joǵarylatýǵa baǵyttalǵan. Nege deseńiz, bizde basty maqsat – energoresýrstardy tsıfrlyq esepke alý. Osy arqyly bızneste energoresýrstyń óńdelýine, tasymaldanýyna, jaratylýyna baılanysty óte kóp salyqtyq mindettemeler paıda bolady», - dep jaýap berdi B. Іlııas eordada ótken brıfıngte.

Onyń aıtýynsha, atalǵan mindettemelerdi ýaqytyly esepke alyp, salyq organdary kameralyq tekserýlerdi tıimdi júrgizýi úshin bul esep tsıfrly túrde bolýy kerek.

«Óıtkeni búgingi kúni keıbir bıznes ókilderi esepke alý qondyrǵylaryn qoıýdan jaltarý amaldaryn jasaıtynyn baıqadyq. Bul esep Úkimetke kerek, salyqtyń kóbirek túsýine kerek, jalpy halyqqa kerek», - dedi mınıstrlik ókili.