Ken oryndaryn qalpyna keltirý boıynsha jol kartasyn ázirleý orynsyz — Úkimet basshysy

<p>ASTANA. KAZINFORM — Karerlerdi rekýltıvatsııalaý jol kartasyn ázirleý orynsyz. Bul jaıynda Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.</p>

«2024 jylǵy 15 qarashadaǵy jaǵdaıǵa sáıkes, qatty paıdaly qazbalar boıynsha 371 qoldanystaǵy kelisimshart jáne 2351 lıtsenzııa bar. Jergilikti atqarýshy organdarmen birge Ónerkásip jáne qurylys mınıstrligi karerlerdi joıý boıynsha turaqty negizde jumys júrgizedi. 402 nysannyń 322 kelisimsharty men lıtsenzııasy boıynsha tekserý nemese joıý aktileri bar. Jyl sońyna deıin jergilikti atqarýshy organdardan qalǵan 80 nysan boıynsha aktilerdi alý josparlanǵan», — dedi Úkimet basshysy jaýabynda.

Úkimet basshysynyń atap ótýinshe, tekserý nemese joıý aktileri bar kelisimsharttar men lıtsenzııalardy mindettemelerimen birge adal ınvestorlarǵa, onyń ishinde buzylǵan kelisimsharttardy aýktsıondar arqyly jer qoınaýyn paıdalaný quqyǵyn berý jumystary júrgizilip jatyr.

«Karerlerdi joıý jumystary júıeli negizde júrgizilip, Úkimettiń turaqty baqylaýynda bolǵandyqtan jol kartasyn ázirleýdi orynsyz dep esepteımiz», — dedi Oljas Bektenov.

Premer-Mınıstr jaýabyna qosymsha berilgen anyqtamaǵa sáıkes, 2022-2023 jyldardaǵy kelisimsharttar men lıtsenzııalar mindettemeleriniń oryndalýyn monıtorıngteý nátıjesinde 402 kelisimshart pen lıtsenzııa boıynsha jer qoınaýyn paıdalaný quqyǵy toqtatyldy.

Eske salsaq, buǵan deıin Premer-mınıstrdiń orynbasary Serik Jumanǵarın Májilis depýtattarynyń saýalyna joldaǵan jaýabynda maqta óńdeıtin zaýyttarǵa elektr qýatyn kóterme baǵamen berýge ne kedergi ekenin aıtty.