Ken óndirýden ónim shyǵarýǵa deıin – «EýroHım-Qarataý» JShS-niń jańa hımııa zaýyty
11 tamyz kúni Sarysý aýdanynda «EýroHım» kompanııalar tobynyń prezıdenti Oleg Shırıaev Úkimet basshysyna iri hımııalyq keshenniń qurylys barysymen tanystyryp, jańa kásiporynnyń álemdik deńgeıde joǵary sanattaǵy tyńaıtqysh shyǵaratynyn atap ótti.
Qazirdiń ózinde «EýroHım-Qarataý» kompanııasynyń taý-ken kesheni bazasynda jylyna 660 myń tonnaǵa deıin fosforıt óndirý, jyldyq qýaty 640 myń tonnaǵa teń fosforıt unyn shyǵarý jolǵa qoıylǵan. Investıtsııa somasy - 126 mln dollar.
Hımııalyq keshen aıasyndaǵy óndiristik qýat jylyna 1 mln tonnadan kem emes daıyn ónimdi quraıtyn bolady. Kompanııa jobaǵa 1 mlrd dollardan astam ınvestıtsııa salyp, qosymsha 1 200 jańa jumys ornyn ashady.
«EýroHım-Qarataý» kompanııasynyń keshendi tyńaıtqyshynyń quramynda azot, fosfor, kalıı bar jáne agrarıılerdiń barlyq mıneraldyq elementterge degen qajettiligin qanaǵattandyrady. Qaıta óńdeýdiń arqasynda biz ónimdi sapaly markada ázirlep, búkil álemge jetkizetin bolamyz», - dep bólisti Oleg Shırıaev.
QR Premer-Mınıstri Álıhan Smaıylov Qazaqstanda agrarıılerge sýbsıdııa berý kóleminiń artyp kele jatqanyn atap ótti.
«Memlekettik qoldaýdyń aıasynda aýyl sharýashylyǵynda tyńaıtqysh qoldaný, ónimdilikti ulǵaıtý qolǵa alynyp, sýbsıdııalaý artýda. Bizde ishki naryq bolady. Syrtqy naryq ta bar, ol jaqta mıneraldy tyńaıtqyshtarǵa úlken suranys baıqalady. Baǵa da jaqsy kóterilip keledi. Keleshegi jaqsy. Úkimet tarapynan siz atap ótken qajetti qoldaýdyń bárin alasyzdar. Barlyq máseleni sheshýge bolady», - dep atap ótti Úkimet basshysy.
Oleg Shırıaev Jambyl oblysy úshin jańa óndiris oshaǵy óńirdiń damyýyna tyń serpin beretinin atap ótti.
«Jańa jumys oryndaryn quratyn bolamyz. Kásiporyndarymyzǵa barynsha kóp qyzmetker tartýymyz úshin jańa mamandyqtar, oqý daıyndyǵy qajet bolady. Biz oǵan múddelimiz. Óıtkeni, ındýstrııany damytý, salyq, áleýmettik ınfraqurylym jáne adamı faktor turǵysynda óńir úshin úlken paıda bar ekenin kórip otyrmyz», - dedi ol.
«EýroHım» kompanııalar tobynyń prezıdenti kásiporyndy damytýdyń áleýmettik aspektisine qatysty toqtalyp, kompanııanyń jumysshylarǵa óte jaqsy jumys jaǵdaıyn jáne áleýmettik qorǵaýdy usynýǵa nıetti ekenin basa aıtty.
«Bizdiń áleýmettik toptamamyz búkil kompanııada birdeı. Kez kelgen lokatsııa, tipti ol Brazılııada, Eýropada, Qazaqstanda ne Reseıde bolsa da teńdeı jaǵdaı jasaımyz. Qyzmetkerlerimiz saqtandyrylǵan. Sportty damytý úshin kóp dúnıe jasap jatyrmyz. Básekege qabiletti jalaqymyz jáne kompanııa ishinde mansap jolynda ósýge múmkindik beretin zor oqytý baǵdarlamamyz bar. Qazirgi ýaqytta kompanııada biliktiligi joǵary kadrlarǵa suranys bar ári olar ishki resýrstar esebinen ózin-ózi damytýǵa múmkindik alady. Munymen korporatıvtik ýnıversıtet aınalysady. Óte mańyzdy aspekt – qyzmetkerlerimizdiń qaýipsizdigi. Olar óte jaqsy qorǵanys quraldaryn paıdalanyp, densaýlyqqa teris áser etpeıtin jaǵdaıda jumys isteýi tıis», - dep atap ótedi ol.
«EýroHım» kompanııalar tobynyń prezıdenti «QazAqparat» tilshisiniń janama ónimder óndirisine qatysty saýalyna oraı jańa zaýyt eki negizgi janama ındýstrııalyq ónim óndiretinin atap ótti.
«Bul – Qazaqstanda joǵary suranysqa ıe kúkirt qyshqyly. Ony satýǵa qatysty aldyn ala ýaǵdalastyq ta bar. Ekinshiden, qurylys kompanııalarymen ózara is-qımyl múmkindigin qarastyryp otyrmyz. Óıtkeni, janama ónimderdiń biri joǵary tazartylǵan gıps bolmaq. Ony panelder men qurǵaq qurylys qospalaryn óndirýge paıdalanýǵa bolady. Bul - joǵary sanatty, ekologııalyq turǵyda taza jáne qurylys ındýstrııasyna qajetti ónim», - dedi Oleg Shırıaev.
Aıta keterligi, jalpy jańa zaýyt salý jobasy Qazaqstannyń eksporttyq áleýetin ulǵaıtýǵa, azyq-túlik qaýipsizdigin arttyrýǵa, aýyl sharýashylyǵy men óńdeý ónerkásibin damytýǵa septigin tıgizedi. Álemde balamasy joq ınnovatsııalyq joǵary tehnologııalyq óndiristi iske qosýǵa múmkindik beredi.
«EýroHım» kompanııasy Qazaqstanda 2008 jyldan beri jumys isteıdi. Sol jyly ol «Sary-Tas» AQ aktsııasynyń memleketke tıesili paketin satyp alǵan bolatyn. Ol kezde zaýyt 15 jyldan beri jumys istemeı toqtap turǵan edi. Kompanııa barlyq qaryzyn, salyqtar men zeınetaqy tólemderin tóledi. Jumysshylar jalaqysyn aldy.
Búginde kompanııa turaqty túrde qaıyrymdylyqqa qarajat aýdaryp keledi. Qaıyrymdylyq jarnasynyń somasy 300 mln teńgeden asyp túsedi. Qarajat óńir jáne búkil respýblıka turǵyndaryna kómekke jumsalady. Atap aıtar bolsaq, EýroHım Arystaǵy jarys saldaryn joıýǵa (38 mln teńge), Qostanaı oblysynda orman órtinen zardap shekkenderge (10 mln teńge) kómek kórsetýge, sonymen qatar Sarysý aýdanynyń mektepterin, ońaltý ortalyǵyn, aýrýhana men basqa da mekemelerdi jıhazben, qural-jabdyqpen qamtamasyz etýge qarajat bóldi.
Munan bólek, kásiporyn óńirdi jáne onyń ınfraqurylymyn damytýǵa arnalǵan áleýmettik tólemderdi turaqty aýdaryp turady. Búginde áleýmettik tólemderdiń jalpy somasy 6,1 mlrd teńgege jetip otyr.