Ken ıgerý, geologııalyq barlaý, qurylys: Elimizde 250,6 myń gektar jer ónerkásip saldarynan búlingen

<p>ASTANA. KAZINFORM &ndash; Qazaqstan aýmaǵynyń 180 mln gektary shóleıttenýge beıim. Bul týraly Ekologııa jáne tabıǵı resýrstar mınıstrliginiń 2023 jylǵy qorshaǵan ortanyń jaı-kúıi týraly ulttyq baıandamasynda aıtylǵan.</p>

- Jerdiń sapalyq sıpattamasynyń derekteri boıynsha Qazaqstanda 90 mln gektardan astam jer erozııaǵa ushyraǵan jáne erozııaǵa ushyraý qaýpi bar. Onyń ishinde is júzinde erozııaǵa ushyraǵan jerdiń kólemi – 29,3 mln gektar. Jel erozııasyna ushyraǵan jerler respýblıkada 24,2 mln ga nemese aýyl sharýashylyǵy alqaptarynyń 11,3%-y, - dep jazylǵan qujatta.

Jel erozııasyna ushyraǵan alqaptarda tuzdy batpaqtar kóbeıip, shańdy daýyldar jıileıdi.

- Jel erozııasyna ushyraǵan agrarlyq alqaptardyń negizgi alańdary Almaty oblysynda – shamamen 2 mln ga, Jetisý oblysynda – 2,9 mln ga, Atyraý jáne Túrkistan oblystarynda – 3,1 mln ga, Qyzylorda oblysynda – 2,8 mln ga, Jambyl jáne Aqtóbe oblystarynda – 2,0 mln ga astam. Aýyl sharýashylyǵy alqaptary quramyndaǵy erozııaǵa ushyraǵan jerlerdiń eń az úles salmaǵy ( 5 %-ǵa deıin) Aqmola, Qaraǵandy, Qostanaı jáne Soltústik Qazaqstan oblystarynda, - dep jazady mınıstrlik sarapshylary.

Al topyraqty sý shaıý jaǵdaıy Qazaqstannyń búkil óńirlerinde baıqalǵan.

- Aýyl sharýashylyǵy alqaptaryndaǵy shaıylǵan topyraqtyń eń úlken bóligi Túrkistan (0,9 mln ga), Mańǵystaý (0,8 mln ga), Aqmola jáne Almaty (0,6 mln ga) oblystarynda ornalasqan. Jel jáne sý erozııasy júıeleriniń bir mezgilde áser etýi 201,7 myń gektar aýmaqta baıqalady. Onyń ishinde 191,9 myń gektary (99,4%) Batys Qazaqstan oblysyna tıesili, - delingen qujatta.

2023 jyldyń aıaǵyndaǵy málimet boıynsha ken ıgerý, geologııalyq barlaý júrgizý, qurylys salý saldarynan búlingen aýmaqtardyń jalpy kólemi 250,6 myń gektar bolǵan. Sonyń 4,9 myń gektary 2023 jyldyń 12 aıynda búlingen. Jalpy búlingen jerdiń eń kóp kólemi Mańǵystaýǵa tıesili.

- 2023 jyly 4,9 myń ga jer buzyldy. Óńirlik josparda buzylǵan jerlerdiń eń kóp aýdany úsh oblysta: Mańǵystaý – 70,5 myń ga, Qaraǵandy – 33,4 myń ga jáne Qostanaı – 41,9 myń ga, - dep jazylǵan mınıstrliktiń ulttyq baıandamasynda.

Eldiń jalpy aýmaǵy 272,5 mıllıon gektar bolsa, sonyń shamamen 180 mıllıon gektary shóleıttenýge beıim.

Osyǵan deıin Qazaqstanda qar men jańbyr jıilep, tuman men boran sıreı bastaǵany týraly jazdyq.