Keń dala baǵdarlamasy aıasynda sharýalar 70 mlrd teńge kóleminde jeńildetilgen nesıe aldy

NUR-SULTAN. QazAqparat - Agrarlyq kredıttik korporatsııa jelisimen AÓK sýbektilerin qarjylandyrýdyń jalpy kóleminiń 40%-dan astamy kredıttik seriktestikter arqyly rásimdeledi, dep habarlaıdy QazAqparat.

Aýyl sharýashylyǵy mınıstrliginiń málimetinshe, jyl basynan beri 216 mlrd teńgeniń 90 mlrd teńgesi nesıelik seriktestikterge qatysýshylardy qarjylandyrý úshin berilgen.

Agrarlyq nesıe korporatsııasy - tikeleı qarjylandyrý jolymen de, sondaı-aq qarjy ınstıtýttary - kredıttik seriktestikterdi, ekinshi deńgeıdegi bankterdi, mıkroqarjy uıymdaryn, lızıngtik kompanııalardy qorlandyrý arqyly da AÓK sýbektilerine qoljetimdi kredıt berýdi usynatyn iri qarjy ınstıtýty. Máselen, bıyl ANK arqyly kóktemgi egis jumystaryn júrgizý úshin aýyl sharýashylyǵy taýar óndirýshileri «Keń dala» baǵdarlamasy boıynsha 70 mlrd teńge kóleminde jeńildetilgen nesıemen qamtamasyz etildi.

«Qalyptasqan makroekonomıkalyq jaǵdaıdy, teńgeniń aıyrbas baǵamynyń álsireýin, dala jumystaryn júrgizý boıynsha shyǵystardyń qymbattaýyn eskere otyryp, Aýyl sharýashylyǵy mınıstrligi qosymsha 70 mlrd teńge tartý jáne kredıtteýdiń jalpy kólemin 140 mlrd teńgege deıin jetkizý boıynsha jumys júrgizip, olar tolyq kólemde Agrarlyq nesıe korporatsııasyna aýdaryldy», - dep habarlady Aýyl sharýashylyǵy vıtse-mınıstri Rústem Qurmanov.

Foto : gov.kz