Kembrıdj ýnıversıtetinde Túrkitaný ǵylymı ortalyǵy ashylady

ALMATY. QazAqparat - ál-Farabı atyndaǵy Qazaq ulttyq ýnıversıtetiniń basshylyǵy Kembrıdj ýnıversıtetiniń (Ulybrıtanııa) Pembrýk kolledjinen, Túrkııa Respýblıkasynan jáne Iran Islam Respýblıkasynan kelgen qonaqtarmen kezdesti.

Úsh jaqty kelissóz barysynda «Iran-Turan» jobasy talqylanyp, adaǵy ýaqytta Kembrıdj ýnıversıtetinde Túrkitaný men QazUÝ-dyń ǵylymı ortalyǵyn ashý uıǵaryldy.

Osyǵan oraı, Túrkııadan kelgen ǵalymdar QazUÝ men Kembrıdj ýnıversıtetterinde túrkitanýǵa baǵyttalǵan ǵylymı-zertteý jumystaryna qoldaý kórsetetindikterin bildirdi. 

«Ábý Nasyr ál-Farabı kezinde Shyǵys pen Batysty jaqyndastyrǵan ǵulama ǵalym bolǵan. Búginde bul uly mıssııany ál-Farabıdiń atyn arqalaǵan álemdegi jalǵyz joǵary oqý orny jalǵastyryp keledi», - dedi Túrkııa Premer-Mınıstriniń bas keńesshisi, BUU Órkenıetter alıansynyń Túrkııadaǵy ulttyq úılestirý komıtetiniń tóraǵasy Bekir Qarlyǵa.

Al Kembrıdj ýnıversıtetiniń Azııa jáne Taıaý Shyǵys fakýltetiniń dekany Charlz Melvıll Ulybrıtanııada Túrki elderiniń tarıhy men mádenıetin zertteý osydan eki ǵasyr buryn qolǵa alynǵandyǵyn, biraq sońǵy 15-20 jylda toqtap qalǵandyǵyn aıtty.

«Kembrıdj ýnıversıtetinde túrkitaný mamandary tapshy.  Túrkitanýdy damytýdy aıta otyryp, ásirese tildi meńgerýdiń mańyzdylyǵyn atap ótý kerek», - dedi ol óz sózinde.

QazUÝ baspasóz qyzmeti habarlaǵanyndaı, is-sapar barysynda shet eldik qonaqtar QazUÝ murajaıyn aralap, ýnıversıtettiń jetken jetistikterimen, tarıhymen tanysty.

«Sizderdiń ýnıversıtettiń zor múmkindikterin kórip, biz QazUÝ-ǵa osy aımaqtaǵy Irantaný ortalyǵyn basqarý quqyǵyn tapsyrýdy usynyp otyrmyz», - dedi osyǵan oraı Islam mádenıeti men baılanys uıymynyń vıtse-prezıdenti Abbas Hamıar.

Aıta ketelik, Kembrıdj ýnıversıtetinde Shahname ortalyǵy jumys jasaıdy jáne munda Parsy qoljazbalarynyń biregeı toptamasy saqtalǵan.

Kezdesý sońynda yntymaqtastyq jóninde úsh jaqty hattamaǵa qol qoıyldy.