Kem degende 180 teńge bolsyn: Almaty avtoparkteri jolaqyny 20 teńgege kóterýge qarsy shyqty

<p>ALMATY. KAZINFORM — Almatyda qoǵamdyq kóliktiń jolaqysyn 20 teńgege kóterý múmkindigi qarastyrylyp jatyr. Qala ákimi qaýlysynyń tıisti jobasy talqylaý úshin Ashyq NQA portalyna jarııalandy.</p>

Almaty qalasynyń jolaýshylar tasymaly kásiporyndary qaýymdastyǵy atap ótkendeı, keıbir avtopark ıeleri atalǵan tarıf shyǵyndy jappaıdy dep otyr. 

«Usynylǵan 120 teńge avtoparktiń máselesin sheshpeıdi. Marshrýttaǵy ortasha tarıf 310 teńge bolǵanda, jolaqy keminde jartysy, ıaǵnı 180 teńge bolýy kerek. Bári kondıtsıoneri bar jańa avtobýspen júrgisi keledi, sondyqtan sapaly qyzmet úshin tıisti tólem bolǵany durys. Ákimdik bizge kem degende 170 mln teńge turatyn elektrmen júretin avtobýstar satyp alýǵa shart qoıady. Sonymen qatar, marshrýt sany kóbeıip jatyr, olarǵa qyzmet kórsetý úshin júrgizýshiler qajet. Ol úshin olarǵa básekege qabiletti jalaqy tóleýimiz kerek. Sondyqtan bul — shamaly ǵana ósim», — dedi City-Bus JShS dırektory Abylaı Óstemir. 

Qazir Almatyda qoǵamdyq kóliktegi tarıf quny qolma-qol aqshasyz tóleý kezinde 100 teńge jáne qolma-qol tóleý kezinde 200 teńge mólsherinde belgilengen.

Ákimdik qoǵamdyq kólikte jol júrý qunyn 20 teńgege qymbattatyp, 120 teńgege deıin arttyrý múmkindigin qarastyryp jatyr.

Sondaı-aq, júrgizýshiler aqsha jınaýǵa alańdamaýy úshin qolma-qol aqshamen tólemdi alyp tastaý da josparda.

Buǵan deıin Almatyda qoǵamdyq kólikte jol júrý aqysy ózgeretinin jazǵan edik.