«Kelin mektebi kerek-aq» - respýblıkalyq basylymdarǵa sholý

ASTANA. 10 qańtar. QazAqparat - Qazaq aqparat agenttigi respýblıkalyq basylymdarda 10 qańtar, seısenbi kúni shyqqan ózekti materıaldarǵa sholýdy usynady.

***

7 qańtar kúni barlyq hrıstıandar Rojdestvo merekesin atap ótti. Osyǵan oraı Memleket basshysy Nursultan Nazarbaev ótken senbide As­ta­na­daǵy Ýspen kafedraly soborynda bar­sha pravoslavıelik hrıstıan­dardy aıtýly me­reke­lerimen quttyqtady. Qańtardyń 6-ynan 7-sine qaraǵan túni elimizdegi basty pravoslavıe shirkeýi sanalatyn Astananyń Ýspen kafedraly soborynda túngi me­rekelik lıtýrgııa bolyp ótti. Prezıdent Rojdestvo merekesi dindarlardyń barlyǵynyń qaı­yrymdylyq, ózara jár­dem­desý jáne súıispenshilik sezimderin, bıik gýmanıstik jáne jasam­pazdyq murat­ta­ryn biriktiretinin erekshe atap ótti. Búgin bul merekeni pra­voslavıelik hrıstıandarmen birge barsha qazaqstandyqtar merekeleýde. Kóp ultty Qa­zaqstanda dástúrli dinder bir-birimen tatýlyqta ózara áre­ket jasap keledi. Biz kóptegen dinı merekelerdi birge atap ótemiz. Memlekettiń azamat­tar­dyń dinı sezimderine qur­metpen jáne uqypty qaraýy - bizdiń elimizdegi konfessııa­ara­lyq kelisimniń mańyzdy negizderiniń biri, - dedi Nursultan Ábishuly óz sózinde. Osy sharanyń uıymdastyrylýy men onda aıtylǵan máseleler týraly «Egemen Qazaqstan» basylymynyń búgingi sanyndaǵy «Aıtýly merekemen quttyqtady» atty maqaladan bilýge bolady.

 Sondaı-aq atalmysh basylymnyń jazýynsha, keshe Parlament Senatynyń Tóraǵasy Qaırat Mámı Qazaqstan Respýblıkasy men Qytaı Halyq Respýblıkasy ara­syndaǵy dıplomatııalyq qarym-qatynastardyń orna­ǵa­nyna 20 jyl tolýyna oraı Qazaqstanǵa kelgen Qy­taı­dyń HÓBJ Turaqty komıteti tóraǵasynyń orynbasary Chen Chjılımen kelissóz júrgizdi. Kezdesý barysynda júz­de­sý­shiler Qazaqstan men Qytaı ara­syn­daǵy túrli saladaǵy eki­jaqty qatynastardy odan ári belsen­di­lendirý máselelerin talqylady.
Senat tóraǵasy ótken 20 jylda bizdiń elderimiz arasyndaǵy ynty­maq­tastyq strategııalyq áriptestik deńgeıine deıin jetkendigin, buniń eki memleket lıderleri Nursultan Nazarbaev pen Hý Tszıntaonyń kúsh-jigeriniń nátıjesi bolyp tabylatyndyǵyn atap kórsetti. Kezdesýde aıtylǵan osy jáne ózge de birqatar máseleler jóninde «Egemen Qazaqstan» basylymynyń búgingi sanyndaǵy «Qytaılyq parlamentshimen kezdesti» atty maqalada.

***

«Aıqyn» basylymynyń jazýynsha, Óskemende birden 30 adam Jalpyulttyq sotsıal-demokratııalyq partııa quramynan shyqqanyn málimdedi. Olardyń aıtýynsha, mundaı sheshim qabyldaýyna óz partııasynyń el úshin eshteńe istemeı, bos sóz ben qurǵaq daýryqshyldyqpen aınalysýy sebep bolypty.Jalpyulttyq sotsıal-demokratııalyq partııa úshin 30 adamnan aıyrylý - aıtarlyqtaı iri oqıǵa. Bul partııanyń Shyǵys Qazaqstan oblysyndaǵy barlyq músheleriniń sany 85 adamnan aspaıtyn. Onyń ústine, partııa qatarynan shyqqandardyń deni - jastar. Olardyń arasynda muǵalimder, dárigerler, qarjygerler men ınjenerler bar. Partııa qatarynan shyqqan belsendiler toby ótkizgen baspasóz jıynynda burynǵy sotsıal-demokrattar munymen ózderiniń saıası belsendiligin toqtatpaıtynyn málimdedi. Olar saılaýaldy naýqanyna endi ózge partııalardyń qatarynda júrip qatysatynyn aıtty. Bul týraly «Aıqyn» basylymynyń búgingi sanyndaǵy «Partııadan shyqty...» atty maqaladan oqyńyzdar.

 Sondaı-aq atalmysh basylymnyń habarlaýynsha, Almatyda «Kelinder mektebin» ashý jóninde usynys kóterilgeli kóp bolsa da, demeýshiler tarapynan qoldaý tabylmaı júr. Ár-ár jerde qyzdarǵa arnalǵan salalyq kýrstar ashylyp jatqanymen, arýlardy kelindik ómirge daıyndaıtyn mekteptiń tusaýy bir kesilmeı-aq qoıdy. Álbette, ana men ene mektebi jaqsy jumys jasap turǵanda, mundaı oqý kýrsyn ashýdyń qajettiligi de bolmas edi, degenmen zaman aǵymy kelinderge tárbıe beretin memlekettik ne qoǵamdyq uıymdardyń qajet ekenin ózi-aq ańǵartyp tur... Bul týraly «Aıqyn» basylymynyń búgingi sanyndaǵy «Kelin mektebi kerek-aq» atty maqaladan egjeı-tegjeıli bilýge bolady.

***

«Kazahstanskaıa pravda» basylymynyń jazýynsha, Ispanııanyń «Barselona» klýbynda óner kórsetetin Argentınalyq fýtbol shabýylshysy Leonel Messı 2011 jyldyń úzdik fýtbolshysy retinde «Altyn dop» marapatyna ıe boldy. Jeńimpazdy marapattaý rásimi Tsıýrıhte ótti. Messıge básekeles bolady degen fýtbolshylardyń arasynda portýgaldyq Krıshtıaný Ronaldý men ıspandyq Hevı Ernandes bar bolatyn. Messı osymen úshinshi ret «Altyn doptyń» ıegeri atandy. Bul týraly «Kazahstanskaıa pravda» basylymynyń búgingi sanyndaǵy «Lýchshım fýtbolıstom planety y tretıı raz podrıad stal argentınets Leonel Messı» atty maqalada.